Хитойда яна ёввойи ҳайвонлар бозори очилди – мамлакат аччиқ тажрибадан хулоса чиқарадими?

Жаҳон 20:59 / 31.03.2020 43252

Daily Mail журналисти хабарига кўра, карантин олиб ташланганидан сўнг, минглаб одамлар Хитойнинг жанубий-ғарбидаги Гуилин бозорига ошиқишган. У ерда Хитойнинг анъанавий қишки таомлари таркибига кирувчи итлар ва мушукларнинг гўшти таклиф қилинмоқда.

«Бу ерда ҳамма инфекцияга барҳам берилди ва хавотирли нарса йўқ, деб ҳисобламоқда. Коронавирус – маҳаллий аҳоли учун ўзгаларнинг муаммоси», - деб хитойлик мухбирнинг сўзларини келтирмоқда Daily Mail.

Донгуандаги ёввойи ҳайвонлар бозорига борган журналист ҳам ҳаммаси аввалгидек яна ўз жойига қайтганини таъкидлади.

«Ягона фарқ шундаки, бозор қўриқчилари суратга олаётганларни тўхтатишга уринмоқда», - деди у.

Коронавирус тарқалишининг илк ҳолатлари Уҳан шаҳридаги ёввойи ҳайвонлар бозорида аниқланган эди. Бироқ, расмий Пекин бир неча ҳафта давомида буни яширди. Ҳатто, бу ҳақда хабар берган Ли Вэньлянни ёлғон маълумот тарқатганликда айблади. 33 ёшли шифокор кейинчалик коронавирус туфайли вафот этди.

Энди инфекция тарқалиши суратлари пасайганидан сўнг, Хитой ҳукумати эпидемияни бошқа мамлакатдан кириб келгани ҳақидаги ғояни илгари сурмоқда. Хусусан, Weibo ижтимоий тармоғида тарқалган хабарда вирус илк маротаба ўтган йилнинг ноябрь ойида Италияда пайдо бўлгани ҳақида ёзилган.

Бундан ташқари, Хитой мулозимлари ҳеч қандай асосга эга бўлмаган ҳолда, вируснинг АҚШ ҳарбийлари томонидан тарқатилгани ҳақидаги фитна назариясини ҳам дастакламоқда.

Кўпроқ янгиликлар