Vazirning qayd etishicha, ayrim fuqarolar o‘zi va boshqalarning hayotini xavf ostida qoldirib, epidemiyaga qarshi kurash qoidalarini buzish bilan bog‘liq huquqbuzarliklar sodir etmoqda. Karantin tadbirlari e'lon qilingan vaqtdan bugungi kunga qadar respublika bo‘yicha karantin qoidalariga amal qilmaslik bilan bog‘liq 3649 ta holat aniqlangan. Xususan:

– Toshkent shahrida – 476 ta holat;

– Toshkent viloyatida – 259 ta holat;

– Jizzax viloyatida – 415 ta holat;

– Buxoro viloyatida – 276 ta holat;

– Samarqand viloyatida – 538 ta holat;

– Qashqadaryo viloyatida – 11 ta holat;

– Surxondaryo viloyatida – 221 ta holat;

– Xorazm viloyatida – 52 ta holat;

– Sirdaryo viloyatida – 53 ta holat;

– Farg‘ona viloyatida – 506 ta holat;

– Navoiy viloyatida – 104 ta holat;

– Namangan viloyatida – 281 ta holat;

– Andijon viloyatida – 316 ta holat;

– Qoraqalpog‘iston Respublikasida – 141 ta holatni tashkil etmoqda.

Bundan tashqari, karantin qoidalari va saniyatariya cheklovlariga rioya qilish yuzasidan tushuntirish ishlari olib borilishiga qaramasdan umumiy ovqatlanish shoxobchalari hamon faoliyat yuritayotgani, odamlarning bir joyda to‘planishiga sabab bo‘layotgani aniqlangan. Jumladan, Jizzax viloyatining Baxmal tumanida istiqomat qiluvchi 25 yashar I.A. umumiy ovqatlanish va ko‘ngilochar joylar faoliyatini vaqtinchalik to‘xtatib turish to‘g‘risida ogohlantirilgan bo‘lishiga qaramasdan, 24 mart kuni o‘ziga qarashli choyxonada 6 nafar mijozga xizmat ko‘rsatayotgani aniqlangan.

Shuningdek, Buxoro viloyatining Buxoro tumanida yashovchi 32 yoshdagi A.J. hududiy profilaktika inspektori tomonidan bir necha marotaba ogohlantirilgan bo‘lishiga qaramasdan 24 mart kuni soat 20:30larda o‘ziga tegishli kafesida 3 nafar mijozga xizmat ko‘rsatayotgani aniqlangan.

Po‘lat Bobojonovning ta'kidlashicha, yuqoridagi va shu kabi boshqa holatlar yuzasidan huquqbuzarlarga nisbatan Ma'muriy javobgarlik to‘g‘risidagi kodeksning 54-moddasi asosida jarima qo‘llangan.