Расмийлар уйдан ишлашни тавсия қиляпти. Бунинг учун интернет-пакетларга чегирма бериладими?

Lifestyle 13:38 / 26.03.2020 28211

Карантин муносабати билан жамоат транспорти ҳаракати чекланган, масофадан туриб ишлаш қатъиян тавсия этилмоқда. Афтидан, кўплаб муассасаларда ишчилар таътилга чиқишади.

Аҳолининг аксарият қисми аллақачон интернетга уланган, бироқ 23-24 март кунлари интернетга талаб ошиши ҳақиқатга яқин. Турли касб эгалари масофадан ишлашга ўтишгач, уйларига ҳам интернет улатишларига тўғри келади.

Умуман олганда, карантин шароитида интернетга уланишнинг энг хавфсиз йўли – мобил қурилмалар орқали. Уйдан чиқишингиз ҳам шарт эмас...

Интернет пакетни сотиб олиб, телефон орқали компьютерни ҳам интернетга осонгина улаш мумкин. Ҳеч қандай ариза, кутишлар, интернетга уланиш учун қаерларгадир бориш, мутасаддилар боғланиш керак эмас. Буларнинг барчасини телефонингиз ёрдамида 5 дақиқа ичида, уйда ўтирган ҳолда амалга оширишингиз мумкин. Шу жиҳатдан мобиль интернет – тез, қулай ва энг муҳими хавфсиз.

Ҳозирги шароитда, яъни эпедимиологик вазиятда ходим уйда ўтиришга ва офисда ишлашга мажбур, бундай ҳолатда файлларни юклаб олиш, юбориш ва ҳоказолар учун 200 ва 500 МБ бир кунга ҳам етмайди. Шу боис бундай кичик мегабайтли пакетлар ҳақида гап ҳам бўлиши мумкин эмас.

Kun.uz барча уяли алоқа компанияларининг сайтларида интернет-пакетларнинг нархларини солиштириб кўрди. Бир сўз билан айтганда, интернетни бир ой муаммосиз ишлатиш учун етадиган, яъни 10-20 гигабайтли пакетлар арзон эмас.

Эҳтимол, Ўзбекистонда коронавирус тарқалишининг олдини олиш бўйича тузилган республика махсус комиссияси мобиль интернет нархларини арзонлаштириш масаласига ҳам эътибор қаратиши керакдир.

Ўз навбатида, Ўзбекистондаги уяли алоқа компаниялари ва интернет-провайдерлар ҳеч бўлмаганда карантин даврида «Уйда қол» деб номланган махсус интернет пакетларини ишлаб чиқишлари мумкин. Бу – карантин даврида масофадан ишлашга мажбур бўлаётган ходимларнинг оғирини анчагина енгиллаштирган бўларди.

21 март кунги брифингда Ахборот технологиялари ва коммуникацияларини ривожлантириш вазирининг ўринбосари Қаҳрамон Йўлдошев иштирок этиб, қатор саволларга жавоб берган эди.

Тадбир давомида у интернет алоқасининг тезлиги ва сифатини ошириш бўйича қилинаётган ишлар ҳақида гапирди, лекин карантин даврида нархларни арзонлаштириш бўйича нималар режалаштирилаётгани ҳақида ҳеч қандай маълумот бермади.

Кўпроқ янгиликлар