Коронавирус билан оғриганларнинг 13 нафарида зотилжам пайдо бўлган — Бош санитария инспектори

Ўзбекистон 16:16 / 26.03.2020 116557

«Коронавирус билан оғриганларнинг аксари Вирусология илмий-текшириш институтида даволанмоқда. Уларнинг саломатлик бўйича кўрсаткичлари доимий назоратга олинган.

Ҳозирги пайтда беморларнинг 13 нафарида коронавирус инфекцияси туфайли юзага келган пневмония (зотилжам — ўпка яллиғланиши)белгилари пайдо бўлган, ташхис рентген текшируви ёрдамида тасдиқланган. Мана шу беморлардан 4 нафарининг аҳволи даволовчи мутахассислар томонидан оғир деб баҳоланмоқда. Аммо унутмаслигимиз керакки, тиббиётда оғир ва ўта оғир ҳолат кескин фарқ қилади», дея Нурмат Отабековнинг сўзларини келтирмоқда  Kun.uz мухбири.

Мутахассис буйрак трансплантацияси қилинган беморларнинг коронавирусга чалиниш эҳтимоли қай даражада бўлиши тўғрисидаги саволга ҳам жавоб қайтарди.

«Нафақат буйрак трансплантацияси жарроҳлик амалиёти ўтказилган шахслар, балки бошқа сурункали соматик касалликларга чалинган аҳоли ҳам хавфли гуруҳга киради. Демак, биз уларни касалланиб қолишдан ҳимоя қилишимиз керак. Ҳар қандай ҳолатда ҳам касалликка эрта ташхис қўйилиб, асоратлар юзага келмасдан туриб даволаш муолажалари бошланса, жиддий асоратларсиз даволаб юбориш имконияти сақланиб қолади ва мавжуд», деди у АОКАда ташкил этилган штабда ўтказилган брифинг чоғида.

Нурмат Отабеков касалликнинг онадан ҳомилага ўтиши ҳақидаги маълумотлар тасдиқланмаганини билдирган.

«Мавжуд тиббиёт адабиётларда коронавирус инфекциясини онадан ҳомилага ўтганини тасдиқловчи маълумотлар йўқ», деди у.

Кўпроқ янгиликлар