АҚШ сенати 2 трлн долларни ташкил этувчи инқирозга қарши чоралар пакетини маъқуллади. Бу ҳақда Bloomberg хабар бермоқда.

Қонун лойиҳаси ушбу ҳафтада овоз бериш учун вакиллар палатасига қўйилади.

Унга кўра, ҳукумат ёши катта америкаликларга 1200 доллардан пул тўлайди. Биргаликда ариза берган эр-хотинга 2400 доллар берилади. Фарзандли оилаларга ҳар бир фарзанди учун 500 доллардан тўланади. Ёрдам миқдори фуқароларнинг даромадига мос бўлади — топиши яхши бўлганлар озроқ пул олади. Бир йилда 99 минг доллардан ортиқ даромад топадиганларга пул берилмайди. 

Ишсизлик нафақаси ҳафтасига 600 долларга оширилади. Ишсизларга ёрдам учун жами 250 млрд доллар маблағ йўналтирилади.

Коронавирус пандемияси сабабли зарар кўрган компанияларга кредит ва ёрдам бериш учун 500 млрд долларга яқин маблағ ажратилади. Кичик бизнесга ўз ходимларини қисқартирмаслик шарти билан 350 млрд доллар берилади.

Миллий хавфсизлик учун ўта муҳим ҳисобланган компаниялар 17 млрд доллар олади. Авиакомпаниялар, юк ташувчилар ва уларнинг пудратчиларига грант ва кредитлар кўринишида 57 млрд доллар ажратилади.

Касалхона ва тиббий харажатлар учун қўшимча молиялаштириш миқдори 150 млрд долларни ташкил этади. Дори-дармонлар захирасини тўлдириш учун 16 млрд доллар, вакцина ва коронавирус инфекциясини аниқловчи тестларни ишлаб чиқаришни тезлаштириш учун 3,5 млрд доллар ажратилади.

Маҳаллий ҳокимиятлар 150 млрд доллар миқдорида ёрдам олади.