Испанияда янги рекорд, Италияда янада кескин чоралар. Сўнгги маълумотлар

Жаҳон 23:39 / 25.03.2020 137626

Сўнгги бир кунда Испанияда Covid-19 738 киши умрига зомин бўлди, мамлакатда вирус қурбонлари сони 3434 нафарга етди ва бу бўйича Испания Хитойни ортда қолдирди. Мамлакатда коронавирус тарқала бошлаганидан буён 47610 киши вирус юқтириб олган, улардан фақат 5367 киши соғайиб кетган.

Пандемиядан энг кўп зарар кўрган давлат эса Италия. Апеннин яриморолида карантин қоидаларини бузганлик учун жавобгарлик кучайтирилган. Коронавирус ташхиси қўйилган одамлар изоляция режимини бузгани учун бир неча минг евро жарима тўлайди ва ҳатто 5 йилгача қамалиши мумкин. Мамлакат бош вазири Жузеппе Конте карантин июль ойига қадар узайтирилиши тўғрисидаги хабарларни рад этди, унинг ваъда қилишича, карантин имкон туғилган заҳоти тўхтатилади.

Сўнгги маълумотларга кўра, Италияда коронавирусдан яна 683 киши вафот этди ва вирус қурбонлари сони 7503 нафарга етди, сўнгги бир кунда яна 5210 киши вирус юқтирган ва жами ҳолатлар 74386тага етган.

Франция дунёда Covid-19’дан ҳалок бўлганлар сони бўйича бешинчи ўринда - 1100 киши. Мамлакат Соғлиқни сақлаш бўйича бош дирекцияси раҳбари Жером Саломоннинг сўзларига кўра, беморларнинг сони янада кўпроқ бўлиши мумкин, чунки статистикада фақат шифохонада вафот этганлар келтирилади. Тиббиётчилар ҳукуматга карантинни бир ярим ойга узайтиришни таклиф қилишмоқда.

Чоршанба куни Covid-19 туфайли Ҳиндистонда уч ҳафталик карантин бошланди. Ҳукумат 1,3 млрд кишига 21 кун мобайнида уйдан чиқишни тақиқлаган. BBC мухбири хабар қилишича, ҳиндлар карантин арафасида ваҳимага тушиб, дўконларни шип-шийдам қилишган.

Ҳиндистонда карантин ўхшаши йўқ амалиёт бўлиб, энг жиддий зарбани қуйи қатлам қабул қилиб олади: хизматчилар, кўча савдогарлари ва қурилишларда ишлайдиганлар. Улар мамлакатда меҳнат бозорининг асосини ташкил қилишади, лекин улар тиббий суғуртага эга эмас, уларда ҳақ тўланадиган таътилга чиқиш имкони йўқ.

Бир қанча штатлар - жумладан, Уттар Прадешда аҳоли жуда тиғиз яшайди, ушбу мамлакатдаги энг қашшоқ штат - тўғридан-тўғри молиявий ёрдамга муҳтожлигини эълон қилган.

GETTY IMAGES
  • Чоршанба кунги маълумотларга кўра, жаҳондаги 190дан ортиқ мамлакатда вирусдан зарарланганларнинг жами сони 450 мингдан ошган, 113 мингдан ортиқ киши тузалган, ўлимлар сони 20 494 нафар.

Бу вақтда Осиё молия бозори АҚШ президенти Дональд Трамп ва Сенат аҳоли ва бизнесга 1,8 трлн доллар миқдорида ёрдам ажратиши ҳақидаги хабарга ижобий реакция берди.

Чоршанба куни японларнинг Nikkei биржаси индекси 7,9 фоизга, Ҳонгконгда Hang Seng индекси - 3,4 фоизга, Австралияда ASX индекси - 5 фоизга ўсди.

GETTY IMAGES

Шу тариқа, молиявий бозордаги давомий хавотирлардан кейин инвесторлар АҚШда тасдиқланган молиявий ёрдам пакети карантин туфайли бутун дунёга иқтисодий зарба таъсири камайишига умид қилишмоқда

Сешанба куни президент Дональд Трамп матбуот анжумани вақтида «туннел охирида ёруғлик кўраётгани» ва мамлакат апрель ойида ўтказиладиган Пасха байрамларигача коронавирусдан фориғ бўлишини кутаётгани ҳақида гапирди.

Шу билан бирга, Нью-Йорк губернатори штатда касаллик ҳаддан ташқари тез тарқалаётгани ҳақида гапирди, ЖССТ вакили эса АҚШ пандемиянинг янги ўчоғига айланиши мумкинлигидан огоҳлантирди.

Фаолиятини вақтинча тўхтатаётган Британия парламенти пандемия билан боғлиқ бир неча фавқулодда қонунлар қабул қилиши кутилмоқда.

Умумий палата аъзолари ўз ишини 21 апрель куни қайта бошламоқчи. Парламент ўз фаолиятини тўхтатишига парламент аъзолари вирус тарқатувчи бўлиши мумкинлиги ҳақидаги хабарлар сабаб бўлди. Бугунги муҳокамалар видеоалоқа воситасида ташкил этилади.

Британия парламенти эпидемия туфайли ёпилиши аввал кузатилмаган. Уч асрдан буён парламент ўз ишини фақат сайловлар арафасидаги одатий таътиллар ва ҳукумат дастурини тайёрлаш давридаги танаффус туфайли тўхтатган. Британ парламенти ҳатто жаҳон урушлари даврида ҳам ишлашда давом этганди.

«Катта еттилик» давлатлари Ташқи ишлар вазирлари видеоконференция орқали коронавирус пандемияси билан курашиш масаласини муҳокама қилишни режалаштирмоқда. Пайшанба куни «Катта йигирматалик» давлатлари ҳам худди шу шаклда мулоқот ташкиллаштиради.

Россияда яна икки ўлим

EPA

25 март куни Москвада яна икки киши вирус қурбони бўлди. Шаҳар оператив штаби маълумотига кўра, беморлар 88 ва 73 ёшда бўлишган. 

Сўнгги бир кунда Россияда беморлар сони 163 нафарга ошди ва жами беморлар сони айни вақтда 658 нафарни ташкил қилмоқда.

Россия президенти Владимир Путин миллатга мурожаатида коронавирус тарқалиши сабабли келаётган ҳафтани иш ҳақи сақланган ҳолда дам олиш ҳафтаси деб эълон қилди.

Путин россияликларни дам олиш ҳафтасида «тартибли ва масъулиятли бўлиш»га ва уйда қолишга чақирди. У таътил касаллик тарқалиши суръатини пасайтириш учун берилаётганини алоҳида қайд этди.

Москва мэри Сергей Собянин кейинги ҳафтада шаҳарда янги чекловлар киритилишини маълум қилди. Унга кўра, умумий овқатланиш жойлари, савдо марказлари, парклар, шунингдек, энг зарур маҳсулотлар сотилмайдиган дўконлар ёпилади.

Пайшанба кунидан Москвада 65 ёшдан катта ёшдаги одамлар кўчага чиқиши мумкин эмас. Бу ёшдаги одамлар кўчага чиқмаслик эвазига 4 минг рубл миқдорида қўшимча нафақа олишади.

Бошқа давлатлар
Сўнгги бир кунда яна қатор давлатларда коронавирус тарқалиши олдини олиш учун янги чекловлар жорий этилди.

Испания бош вазири ўринбосари Кармен Кальвога ҳам коронавирус ташхиси қўйилди. Бунгача Испанияда икки вазир, шунингдек, бош вазир Педро Санчеснинг рафиқаси Бегоня Гомесда коронавирус аниқланганди.

Эстонияда коронавирусдан илк ўлим ҳолати қайд этилди, Озарбойжонда ҳам кейинги ҳафта ишсиз ҳафта сифатида эълон қилинди, Литва умуммиллий карантинни 13 апрелга қадар узайтирди, Польша ҳам чегараларини 13 апрелга қадар ёпиқ қолдиришга қарор қилди.

Покистон, Польша, Эквадор ва Чили ҳам беморлар сони мингдан ошган давлатлар қаторига қўшилди, Португалияда вирусдан зарарланганлар сони 3 мингдан ошиб кетди, Эронда қурбонлар сони 2 мингдан ошган, Украинада Вазирлар Маҳкамаси бутун мамлакатда фавқулодда ҳолат жорий этишга розилик берди, Янги Зеландияда ҳам фавқулодда ҳолат режими жорий этилган, Африканинг Мали ва Гвинея-Бисау давлатида коронавирусдан зарарланиш билан боғлиқ илк ҳолатлар қайд этилди, Нидерландияда қурбонлар сонида кесин ўсиш кузатилди - 80 киши.

Сингапурда коронавирус бўйича натижани 5 дақиқада чиқариб берадиган тест ишлаб чиқилди, Хитойда атиги 47 киши вирусдан зарарланди. Жанубий Кореяда вирусдан зарарланганларнинг 40 фоизи тузалиб кетган, мамлакат президенти Мун Жэ Ин «Катта йигирматалик» саммитида мамлакатнинг коронавирусга қарши тажрибаси билан ўртоқлашади.

Ўзбекистондаги вазият

Ўзбекистонда 25 март куни яна 10 кишида вирус тасдиқланди ва беморлар сони 60 нафарга етди.

Бугун Ўзбекистонга иккита чартер рейс амалга оширилди, Фарғонага Истанбулдан 244 киши олиб келинди, самолёт бортида бўлганлардан бири инсульт туфайли вафот этган. Текширув натижасида тана ҳарорати юқори бўлган фуқаролар аниқланмаган. Уларнинг барчаси Олтиариқ туманидаги «Қизилтепа» фахрийлар сиҳатгоҳига жойлаштирилган ва тўлиқ тиббий кузатувга олинган.

Шу куни Бухорога Москвадан яна бир самолёт хориждаги ўзбекистонликларни олиб келган, 266 йўловчидан ташқари бортда хорижда вафот этган ватандош жасади бўлган, йўловчилардан 4 нафарида юқори ҳарорат қайд этилгани учун улар алоҳида назоратга олиниб, улар Юқумлик касалликлар шифохонасига олиб борилган. Қолган йўловчилар ҳам карантинга жойлаштирилган.

Соғлиқни сақлаш вазирлиги маълумотига кўра, айни вақтда Фарғона вилоятида ҳам коронавирус ташхиси қўйилган икки киши даволанмоқда. Улардан бири Саудия Арабистонида Умра сафарида бўлиб қайтгач, унда коронавирус инфекцияси аниқланган.

Айни вақтда Тошкент шаҳридаги Вирусология илмий текшириш институти клиникасида даволанаётган беморлар орасида пойтахтдан ташқари, Навоий, Самарқанд, Қашқадарё ва Тошкент вилоятларидан бўлган фуқаролар ҳам бор.

Кун якунида Наманган вилояти Наманган шаҳрида ҳам бир кишида вирус аниқланди, у яқинда Туркиянинг Истанбул шаҳридан келган.

Айни вақтда Наманган шаҳри бутунлай ёпиб қўйилган.

Кўпроқ янгиликлар