Паст Дарғомлик тадбиркор ва депутат бугунги синовли кунларда намуна кўрсатиб, саховатпеша юртдошларимизни бирдамликка чорламоқда.

Паст Дарғомнинг Қўқони, Жағалбойли, Қорағуппа ва Нормуродов номли маҳаллаларидан сайланган депутат ушбу маҳалладаги кам таъминланган, шароити оғир хонадонларга, ногиронлиги бор шахсларга бир миллион сўмдан пул, бир қоп ун, беш литр ёғ, икки кило шакар, икки кило гўшт, беш дастадан исириқ, уйда ўқиш учун«Қуръони Карим» китоби, ҳадис ва бадиий китоблар ҳамда қирқтадан тиббий ниқоблар тарқатди. 

«Адолат» социал-демократик партияси туман кенгаши депутати Қуёш Ҳақбердиев бу ишдан кўзланган мақсад ҳақида гапириб:

«Аввало, ўнг қўлинг билан қилган савоб ишни чап қўлинг сезмай қолсин дейишган. Ҳозир халқимиз учун синовли кунлар давом этмоқда. Албатта, тез орада бу синовни енгиб ўтиш насиб қилсин. Шундай паллада бир четда томошабин бўлиб туриш ярашмайди. Бугунги кунда барчадан уйда қолиш, ўзи ва яқинларининг саломатлиги учун ҳам кўчага, одам гавжум жойларга чиқмаслик сўраляпти. Ҳар ким қўлидан келгунича, бир-бирларига ёрдам бериши керак, шарт деб ҳисоблайман. Ҳеч бўлмаганда, бир оғиз ширин сўз ҳам бундай пайтда одамга малҳам бўлади.

Тўғри,  давлат ҳеч кимни ўз ҳолига ташлаб қўймайди. Кечагина Олий Мажлис Сенати раиси ҳам худди шу масалага тўхталиб, карантин даврида боқувчисиз инсонлар ва қарияларга моддий ёрдам берилиши кераклигини айтди. Аммо биз ҳам қараб турмаслигимиз керак. Имкони бор ҳамюртлар топган-тутганимизни шароити оғир кишилардан аямаслигимиз шарт, деб ҳисоблайман.

Бизни ишимизни кўриб бошқа саховатпеша инсонлар ҳам шундай йўл тутишидан жуда умидвормиз» дейди.

Ҳолидан хабар олинган паст дарғомликлар бундан жуда хурсанд эканликларини айтиб, саховатпеша инсонлар сафи тобора кўпайишини сўраб дуо қилдилар.