Барча акциядорлик жамиятларига умумий акциядорлик йиғилишларини қолдириш тавсия этилди

Ўзбекистон 13:13 / 25.03.2020 1815

Вазирлар Маҳкамасининг 2020 йил 23 мартдаги 176-сонли қарорига биноан, 23 мартдан бошлаб Ўзбекистон ҳудудидаги барча оммавий тадбирлар, шу жумладан байрам тадбирлари, халқаро тадбирлар ва спорт мусобақалари, ҳамда оммавий йиғилишлар ўтказилиши вақтинча тўхтатилди, шунингдек 24 мартдан республика ҳудудида кучайтирилган тартиб жорий этилди.

Коронавирус инфекциясининг республикада тарқалишининг олдини олиш мақсадида, Капитал бозорини ривожлантириш агентлиги барча акциядорлик жамиятларига яқин кунларда ўтказилиши режалаштирилган умумий акциядорлик йиғилишларини кучайтирилган тартиб якунига қадар қолдиришни тавсия қилди. 

Билдирилишича, бу орқали карантин муносабати билан йиғилишларда қатнашиш имконияти мавжуд бўлмаган акциядорларнинг ҳуқуқлари ва манфаатлари ҳимояси таъминланиши ҳам кафолатланади.

“Сизга шуни маълум қиламизки, ҳозирги вақтда Aгентлик томонидан акциядорларнинг умумий йиғилишларида акциядорларнинг масофадан туриб электрон овоз бериш имкониятини жорий этиш тўғрисидаги қонун лойиҳасини тайёрланди”, - дейилади хабарда.

Шу билан бирга, коронавирус инфекциясининг тарқалишини олдини олиш мақсадида идоравий бўйсунуви ва ташкилий-ҳуқуқий шаклидан қатъи назар барча ташкилотлар:

асосий иш фаолиятига таъсир этмаган ҳолда қонун ҳужжатларида белгиланган тартибда ходимларни меҳнат таътилига чиқариш, қолган қисмининг меҳнат фаолиятини максимал даражада масофадан туриб ("онлайн" режимда ёки масофавий тарзда) ташкил этиш чораларини кўриши;

ташриф буюрувчи шахсларни фақат тиббий ниқоб ва тиббий воситаларни қўллаган ҳолда киритиш тартибини мажбурий жорий этиши;

иш жойларида ходимларнинг тана ҳароратини ўлчаш ва тана ҳарорати юқори бўлган ходимларни иш жойида бўлишига йўл қўймаслик ҳамда ушбу ходимлар тўғрисида соғлиқни сақлаш органларига зудлик билан хабар етказиши;

давлат санитария назорати органларининг талабномасига мувофиқ коронавирус инфекциясини юқтирган ходим билан мулоқотда бўлганлар ҳақида дарҳол маълумот бериши, касалланган шахс бўлган жойларни дезинфекциядан ўтказиш чораларини кўриши шарт экани айтилади.

Кўпроқ янгиликлар