O‘zbekistonda badmintonni rivojlantirish chora-tadbirlar dasturi tasdiqlandi

Sport 14:05 / 12.03.2020 1664

O‘zbekistonda badminton sport turini rivojlantirish chora-tadbirlari dasturi tasdiqlandi.

Quyidagilar Dasturning asosiy yo‘nalishlari etib belgilandi:

badminton sport turi bilan shug‘ullanuvchilar uchun shart-sharoitlar yaratish, ushbu sport turining moddiy-texnika bazasini mustahkamlash, ularni zamonaviy sport anjomlari bilan ta'minlash, ushbu yo‘nalishda davlat-xususiy sheriklik sub'yektlarining faoliyatini rivojlantirish;

badminton sport turi bo‘yicha kadrlar salohiyatini yanada oshirish, yuqori malakali, chuqur kasbiy bilimga va axloqiy fazilatlarga ega bo‘lgan malakali trenerlarni tayyorlash, qayta tayyorlash, ularni ilmiy-metodik jihatdan ta'minlash;

aholining keng qatlamlari o‘rtasida badminton bo‘yicha ommaviy sog‘lomlashtirish ishlarini rivojlantirish, musobaqalarni o‘tkazish, iqtidorli sportchilarni aniqlash, qo‘llab-quvvatlash va maqsadli tayyorlash;

O‘zbekistonda badminton sport turini yanada rivojlantirish maqsadida ushbu sport turi bo‘yicha yuqori natijalarga erishgan mamlakatlar tajribasini o‘rganish, zarur hollarda xorijiy trenerlar va mutaxassislarni jalb qilish;

ommaviy axborot vositalari, shu jumladan, elektron va Internet jahon axborot tarmog‘i orqali aholi o‘rtasida badminton sport turining sog‘lom turmush tarziga ijobiy ta'sir etuvchi vosita ekanligini targ‘ib qilish ishlarini tashkil etish.

Dasturda nazarda tutilgan tadbirlarni o‘z vaqtida va sifatli amalga oshirishda tegishli vazirliklar va idoralar rahbarlari, Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlarining shaxsiy mas'uliyati belgilab qo‘yildi.

Jismoniy tarbiya va sport vazirligi Badminton federatsiyasi bilan birgalikda ikki hafta muddatda hududlarda badminton sport turini yanada rivojlantirish, shu jumladan tegishli tuman (shahar)larda badminton bo‘yicha klublarni tashkil etish bo‘yicha kompleks chora-tadbirlar dasturi namunasini ishlab chiqadi hamda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga yuboradi.

Quyidagilar Dasturning moliyalashtirish manbalari etib belgilanadi:

Jismoniy tarbiya va sport vazirligining sport va ommaviy jismoniy tarbiya tadbirlarining kalendar rejasida nazarda tutilgan mablag‘lar;

Davlat budjetining “Ta'lim” sohasiga ajratiladigan mablag‘lar;

Milliy olimpiya qo‘mitasi mablag‘lari;

Badminton federatsiyasi mablag‘lari;

imtiyozli xorijiy kreditlar va grantlar;

jismoniy va yuridik shaxslarning homiylik xayriyalari;

qonun hujjatlarida taqiqlanmagan boshqa manbalar.

Jismoniy tarbiya va sport vazirligi:

Jismoniy tarbiya va sport vazirligi huzuridagi Jismoniy tarbiya va sport bo‘yicha mutaxassislarni ilmiy-metodik ta'minlash, qayta tayyorlash va malakasini oshirish markazida 2020 yildan boshlab badminton sport turi uchun 3 oylik qisqa muddatli qayta tayyorlash o‘quv kurslari tashkil etadi;

Oliy va o‘rta maxsus ta'lim vazirligi bilan birgalikda Jismoniy tarbiya va sport universitetining bakalavriat ta'lim yo‘nalishiga 2020/2021 o‘quv yili uchun ajratilgan qabul parametrlarini yo‘nalishlar bo‘yicha taqsimlashda badminton sport turi uchun kvotalarini oshirishini ta'minlaydi;

2020/2021 o‘quv yilidan boshlab Jismoniy tarbiya va sport universitetida badminton sport turi uchun kafedra tashkil qiladi hamda yuqori malakali kadrlar bilan to‘ldirilishini ta'minlaydi.

Ko‘proq yangiliklar: