«Спортчи бироз эҳтиётсизлик қилган». Допинг туфайли Олимпиададан маҳрум қилинган Ҳасанбой Раҳимов борасида баёнот берилди

Спорт 22:38 / 07.03.2020 10043

Ўзбекистонлик эркин курашчи Ҳасанбой Раҳимов (-125 кг) антидопинг қоидаларини бузгани учун 2020 йилги Токио Олимпиадаси йўлланмасидан маҳрум қилингани ҳақида хабар берилганди. Жисмоний тарбия ва спорт вазирлиги бу борада расмий баёнот берди.

 «Ўзбекистон спорт курашлари ассоциациясига Бирлашган спорт дунёси United World Wrestling (UWW) федерациясидан ҳам расмий мактуб келиб тушган. Мактуб мазмунида UWW Мустақил антидопинг ташкилоти (ITA) таҳлилларига асосланган ҳолда Ҳасанбой Раҳимовда допинг аниқланганини айтилган.

 Баён қилинишича, Ҳасанбой Раҳимовдан ўтган йили Қозоғистоннинг Нур-Султон шаҳрида ўтказилган спорт курашлари бўйича катталар ўртасидаги Жаҳон чемпионати чоғида олинган допинг-таҳлил ижобий натижа берган. Текширув Германиянинг Дрезден шаҳридаги лабораторияда ўтказилган. Раҳимовнинг қон таркибида тақиқланган кломифен (S4 тоифа. гормонлар ва модуляторлар, метаболизм/кломифен) моддаси борлиги аниқланган.

 Айнан Нур-Султондаги жаҳон чемпионатида Ҳасанбой Раҳимов 125 кг вазн тоифасида бронза медалини қўлга киритиш баробарида Токио-2020 Олимпиадаси лицензиясини ҳам расмийлаштирган эди.

 Ўзбекистон спорт курашлари ассоциациясининг маълум қилишича, Ҳасанбой Раҳимов соғлиғида юзага келган муаммо сабаб шифокор тавсиясига кўра, дори воситаси қабул қилган. Аммо бу восита таркибида тақиқланган кломифен моддаси борлигини билмаган. Спортчи ўша пайтда соғлиғини биринчи ўринга қўйгани учун бироз эҳтиётсизлик қилган», - дейилади Жисмоний тарбия ва спорт вазирлиги расмий хабарида.

 Маълумот учун, Ҳасанбой Раҳимовдан ташқари суриялик Бадҳа Хутаба (-125 кг) ва франциялик Зелимхон Ҳожиев (-74 кг) ҳам қонидан допинг топилгани сабабли дисквалификация қилинганди. 

Кўпроқ янгиликлар