Терма жамоалар таркибига спортчиларни саралаш тизими такомиллаштирилади - Ҳукумат қарори

Спорт 17:38 / 05.03.2020 2656

Жисмоний тарбия ва спорт вазирлиги, Халқ таълими вазирлиги, Олий ва ўрта махсус таълим вазирлиги ҳамда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг ҳудудларнинг ўзига хос хусусиятлари, аҳолининг қизиқишлари ва хоҳиш-истакларидан келиб чиқиб, умумтаълим мактаблари, олий таълим муассасаларини камида биттадан устувор, истиқболли, ривожланаётган, шу жумладан, миллий спорт турларига ихтисослаштириш, ихтисослаштирилган хар бир туман (шаҳар)да иқтидорли ёшларни спорт тури билан шуғулланиш учун спорт иншоотларнинг аниқ манзилини белгилаш ва спорт инфратузилмасини ривожлантириш, шунингдек, иқтидорли спортчиларни спорт турлари бўйича терма жамоалар таркибига саралаш (селекция) тизимини такомиллаштириш тўғрисидаги таклифи маъқулланди.

Жисмоний тарбия ва спорт вазирлиги, Халқ таълими вазирлиги, Олий ва ўрта махсус таълим вазирлиги:

бир ой муддатда умумтаълим мактабларини камида биттадан устувор, истиқболли, ривожланаётган, шу жумладан, миллий спорт турларига ихтисослаштириш, спорт турлари бўйича ихтисослаштирилган туман (шаҳар)ларнинг таълим муассасалари ўқувчилари ўртасида “Мактаб лигаси” ҳамда олий таълим муассасалари талабалари ўртасида “Талаба лигаси” мусобақаларини ташкил этиш ва ўтказиш юзасидан манфаатдор вазирликлар ва идоралар билан келишган ҳолда мусобақаларни ўтказиш тўғрисидаги низомни ҳамда мусобақалар дастурини ишлаб чиқадилар ва тасдиқлайдилар;

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда тасдиқланган Низом ва мусобақалар дастурига мувофиқ спорт турлари бўйича ихтисослаштирилган туман (шаҳар)ларнинг таълим муассасалари ўқувчилари ўртасида “Мактаб лигаси” ҳамда олий таълим муассасалари талабалари ўртасида “Талаба лигаси” мусобақаларини доимий равишда ташкил этиш ва ўтказиш чораларни кўрадилар.

Олий таълим муассасаларини спорт турларига ихтисослаштириш рўйхати, республика туман (шаҳар)ларини устувор, истиқболли, ривожланаётган спорт турларига ихтисослаштириш бўйича спорт иншоотларининг манзилли рўйхати, спорт турлари бўйича спортчиларни саралаш (селекция) ва тайёрлаш тартиби тўғрисидаги низом тасдиқланди.

Жисмоний тарбия ва спорт вазирлиги республика спорт федерация (уюшма)лари билан биргаликда уч ой муддатда умумтаълим мактаб ўқувчиларини спорт мактабларига саралаш мезонини ишлаб чиқади ва тасдиқлайди.

Халқ таълими вазирлиги Жисмоний тарбия ва спорт вазирлиги билан биргаликда:

умумтаълим мактабларида уларнинг моддий-техника базасидан келиб чиқиб, ўқувчилар қизиқишига кўра болалар ва ўсмирлар спорт мактабларининг футбол бўйича тармоқ тўгаракларини ташкил этиш;

спорт турлари бўйича юқори иқтидорга эга бўлган ёш спортчиларни саралаб олиш (селекция) тизимини йўлга қўйиш (бунда умумий ўрта таълим мактабида умумий ўрта таълим муассасаларининг спорт тўгаракларига қабул қилинган ўқувчилар рўйхатидан иборат бўлган ягона электрон “Спорт тўгараги” онлайн тизими яратилади), уларни ўқитиш, тарбиялаш ва индивидуал хусусиятларини ривожлантириш, спорт соҳасидаги қобилиятини янада ошириш чораларини кўради.

Қорақалпоғистон Республикаси Вазирлар Кенгаши раиси, вилоятлар ва Тошкент шаҳар ҳокимларига жисмоний тарбия ва спорт муассасаларининг моддий-техника базасини қўллаб-қувватлаш ҳамда уларнинг инфратузилмасини ривожлантириш, хусусан:

ҳудудларда жисмоний тарбия ва спорт-соғломлаштириш муассасаларининг моддий-техника базасини мустаҳкамлаш чораларини кўриш, шу жумладан, спорт таълими муассасалари ходимларининг жамиятдаги ўрнини оширишга қаратилган чора-тадбирларни белгилаш;

туман (шаҳар)ларни комплекс ижтимоий-иқтисодий ривожлантириш бўйича сектор раҳбарлари билан биргаликда спорт таълим муассасалари фаолиятини ривожлантириш ва уларни куз-қиш мавсумига самарали тайёрлаш тадбирларини Қорақалпоғистон Республикаси Вазирлар Кенгаши, вилоятлар ва Тошкент шаҳар, туман (шаҳар) ҳокимликларининг қўшимча маблағлари ҳисобига ҳамда ҳомийлар хайриялари асосида амалга ошириш;

ҳудудларда жисмоний тарбия ва спортнинг оммавийлигини оширишга кўмаклашиш масалалари бўйича вазирликлар, идоралар ва бошқа ташкилотларнинг ҳудудий бўлинмалари раҳбарларининг ҳисоботларини эшитиш;

жисмоний тарбия ва спорт-соғломлаштириш муассасаларидаги мавжуд муаммоларни тезкор ва самарали ҳал қилиш бўйича тегишли чора-тадбирларни амалга ошириш вазифалари юкланди.

Кўпроқ янгиликлар