Россиядан Уммонгача. 2020 йилда легионерга айланган ўзбекистонлик 12 футболчи

Спорт 15:15 / 03.03.2020 12687

2020 йилги футбол мавсуми олдидан ўзбекистонлик бир қатор футболчилар хориждаги янги клубларида фаолият бошлашди. Tribuna.uz легионерга айланган футболчиларимиз трансферининг муҳимлиги, чемпионати даражасидан келиб чиқиб рейтинг тузди.

 1. Остон Ўрунов
«Локомотив» - «Уфа» (Россия)
Ўтиш мақоми:
трансфер – 150 минг АҚШ доллари

2020 йилнинг энг муҳим трансфери сифатида Остон Ўруновнинг Суперлигамиздан Россия Премьер-лигасига йўл олганлигини кўрсатишни лозим топдик. 19 ёшли яримҳимоячи Тошкентнинг «Локомотив» клубидан Бошқирдистоннинг «Уфа» клубига ўтди. Вадим Евсеев устозлигидаги клуб билан Кипрда машғулот олиб борган Ўруновни Россия клуби биринчи ҳафтанинг ўзидаёқ ўз сафига қўшиб олди. «Betting Insider»нинг ёзишича, «Уфа» клуби Ўзбекистон миллий жамоаси яримҳимоячиси учун Тошкент клубига 150 минг АҚШ доллари тўлаган. Ўз дебютини нишонлашга улгурган Ўрунов айни дамда Россия Премьер-лигасидаги Шомуродовдан кейинги иккинчи вакилимизга айланди.

 2. Азиз Ғаниев
«Насаф» - «Шабоб Ал-Аҳли» (БАА)
Ўтиш мақоми:
трансфер – 700 минг АҚШ доллари

Ўзбек футболининг ёрқин иқтидорларидан яна бир Азиз Ғаниев ҳам ниҳоят легионерлик мақомини олди. Ўзбекистон олимпия жамоаси етакчиси Осиё чемпионатидан кейин Қаршининг «Насаф» клуби томонидан БААнинг «Шабоб Ал-Аҳли» клубига трансфер қилинди. Маълумотларга кўра, араб клуби 22 ёшли ўзбекистонлик футболчи учун Қарши клуби ҳисоб рақамига 700 минг АҚШ доллари трансфер пули ўтказиб берган. Ғаниев БАА клуби сафида Осиё Чемпионлар лигасида иштирок этмоқда, БАА чемпионлиги учун курашмоқда. «Шабоб Ал-Аҳли» айни дамда ўз чемпионатида пешқадам саналади.

3. Жамшид Искандеров
«Локомотив» - «Сеонгнам» (Жанубий Корея)
Ўтиш мақоми:
эркин агент

Тошкентнинг «Локомотив» клубидан легионерга айланган яна бир футболчи Жамшид Искандеров бўлди. 26 ёшли яримҳимоячи Жанубий Кореянинг «K» лигаси иштирокчиси «Сеонгнам» клубига эркин агент сифатида ўтди. Мамлакатнинг кучли клубларидан бири, ОЧЛ ғолиби саналмиш бу жамоа Ўзбекистон миллий жамоаси футболчиси билан 2 йиллик шартном имзолади. Коронавирус сабабли Корея юқори дивизиони ўйинлари старти кечиктирилгани боис, Искандеров ҳозирча турнирда дебютини ўтказгани йўқ.

 4. Достон Турсунов
«Ренофа Ямагучи» - «Пусан» (Жанубий Корея)
Ўтиш мақоми:
трансфер – 100 минг АҚШ доллари

Ўзбекистон миллий жамоасига номзод футболчи Достон Турсуновнинг фаолиятида ўсиш кузатилмоқда. Ўтган мавсум Япониянинг иккинчи лигасида «Ренофа Ямагучи» клуби шарафини ҳимоя қилган 24 ёшли ҳимоячи Жанубий Кореянинг юқори дивизионига чиққан «Пусан Парк» клубидан таклиф олди ва январь ойида шартнома тузди. Маълумотларга кўра, Турсуновнинг японлар билан яна бир йиллик шартномаси қолгани учун корейс клуби 100 минг АҚШ доллари трансфер пули тўлаган. Жамшид сингари Достоннинг ҳам «K» лигадаги дебюти кечикмоқда.

 5. Сардор Мирзаев
«Локомотив» - «Муонгтонг Юнайтед» (Таиланд)
Ўтиш мақоми:
эркин агент

Мавсум олдидан «Локомотив»ни тарк этган учинчи футболчи Сардор Мирзаев бўлди. 28 ёшли яримҳимоячи Таиланднинг «Муонгтонг Юнайтед» клуби сафига эркин агент сифатида қўшилиб, 2022 йилгача шартномага имзо чекди. Таиланднинг «МЮ» клуби чемпионатнинг тўрт туридан кейин 16 жамоа орасида 7-ўринда бормоқда. Ҳамюртимиз клуби сафида 3та ўйинга майдонга тушишга улгурди.

 6. Жасур Яхшибоев
«Пахтакор» - «Энергетик» (Белорусь)
Ўтиш мақоми:
ижара асосида

Ўтган мавсумнинг иккинчи қисмини ижара асосида ОКМКда ўтказган Жасур Яхшибоевни Осиё чемпионатидан (U-23) кейин «Пахтакор» сафида қолиши кутилганди. Аммо амалдаги чемпион таркибдаги рақобат сабаб 22 ёшли футболчини бу сафар легионерга айлантирди. Ҳужумкор яримҳимоячи Белорусь Премьер-лигаси вакили «Энергетик» жамоасига бир йиллик ижарага берилди. Чемпионат ўйинларига 19 март куни старт берилади. Дастлабки турда Яхшибоев жамоаси БАТЭга қарши майдонга тушади.

 7. Ислом Тўхтахўжаев
«Локомотив» - «Шенянг Урбан» (Хитой)
Ўтиш мақоми:
эркин агент

«Локомотив»ни тарк этиб легионерга айланган 4-футболчи Ислом Тўхтахўжаев бўлди. Ўзбекистон миллий жамоаси ҳимоячиси Тошкент клубидаги 7 йиллик фаолиятидан кейин жамоани эркин агент сифатида тарк этиб, Хитойнинг «Шенянг Урбан» клуби сафига ўтди. 2019 йил якунларига кўра, Хитой иккинчи лигасидан биринчи лигасига чиққан бу жамоа 2020 йилда Хитой Суперлигасига чиқишни мақсад қилган. Бироқ мамлакатда тарқалган коронавирус туфайли чемпионат ўйинлари қолдирилганлиги боис, Тўхтахўжаев клуби сафида дебютини ўтказганича йўқ.

 8. Хуршид Ғиёсов
«Бунёдкор» - «Аньянг» (Жанубий Корея)
Ўтиш мақоми:
эркин агент

«Бунёдкор»нинг сўнгги мавсумдаги етакчиси Хуршид Ғиёсов ҳам ўз фаолиятида илк марта легионерга айланди. 24 ёшли ҳужумкор яримҳимоячи Тошкент клуби билан амалдаги шартномаси якунига етгач, эркин агент сифатида Жанубий Кореяга йўл олди. Ғиёсов Кореянинг қуйи лигаси «K-2» вакили саналмиш «Аньянг» клуби билан шартнома имзолади. Ушбу мамлакатда ҳам ўйинлар қолдирилгани боис, футболчимиз ҳали расмий дебютини ўтказгани йўқ.

 9. Шоҳрух Гадоев
«Бунёдкор» - «Кешли» (Озарбойжон)
Ўтиш мақоми:
эркин агент

Ўтган мавсумда Жанубий Кореядан қайтгач, ярим йил «Бунёдкор» шарафини ҳимоя қилган Шоҳрух Гадоев декабрь ойида Озарбойжонга йўл олди. Бокунинг «Кешли» клуби сафига эркин агент сифатида қўшилиб, бир йиллик шартнома имзолаган Гадоев, Озарбойжон Премьер-лигасида 5 ўйинда майдонга тушиб, 2та голга муаллифлик қилишга улгурди. «Кешли» 19-турдан кейин 8 жамоа орасида 3-ўринни банд этиб турибди.

 10. Артём Филипосян
«Прачуап» (Таиланд) - «Тира Персикабо» (Индонезия)
Ўтиш мақоми:
эркин агент

Сўнгги мавсумларни шарқий Осиё чемпионатларида ўтказиб келаётган яна бир ҳамюртимиз Артём Филипосян бу сафар Таиланддан Индонезия клубига ўтди. Ўтган мавсумда «Прачуап» билан Таиланд кубоги соҳибига айланган Филипосян мавсум якунида Ўзбекистон клубларидан таклиф олиб, ортга қайтганди. Аммо шартнома борасида келишувга эриша олмагач, молиявий жиҳатдан яхши таклиф билан чиққан Индонезиянинг «Тира Персикабо» клуби билан бир йиллик келишувга эришди. 31 ёшли ҳимоячи тез орада клуби сафида дебютини ўтказади.

 11. Андрей Сидоров
«Пахтакор» - «Хўжанд» (Тожикистон)
Ўтиш мақоми:
ижара асосида

Сўнгги мавсумларни «Қизилқум», «Қўқон-1912» жамоаларида ижара асосида ўтказган Осиё чемпиони Андрей Сидоров фаолиятида илк марта легионерга айланди. 24 ёшли ҳужумчи «Пахтакор»дан Тожикистоннинг «Хўжанд» клубига бир йиллик ижарага берилди. Сидоровнинг дебюти омадли чиқди. ОФК Кубоги плей-офф баҳсида Қирғизистоннинг «Нефтчи» клубини (3:0) мағлуб этган хўжандликлар гуруҳ босқичига йўлланма олишди.

Қайд этиш жоиз, Сидоровдан ташқари Тожикистоннинг ўтган мавсумдаги вице-чемпиони сафига Маъмур Икромов («Локомотив»), Санжар Рихсибоев («Бунёдкор»), Сирож Ҳамроев («Динамо») сингари ҳамюртларимиз тўп суришмоқда.

 12. Павел Пуришкин
«Оқтепа» - «Оман ФК» (Уммон)
Ўтиш мақоми:
эркин агент

Ўтган мавсумда Про-лига баҳсларида тўпурарлар қаторидан жой олган «Оқтепа» клуби ҳужумчиси Павел Пуришкин бу сафар ҳам ўзи учун янги мамлакатни кашф этишни истаган кўринади. Ўтган йиллар давомида Қозоғистон, Малайзия, Индонезия клубларида тўп суриб қайтган 31 ёшли ҳужумчи бу сафар Уммоннинг «Оман» клуби билан ярим йиллик шартномага имзо чекди. Клуби сафида дебют қилишга улгурган Павелнинг жамоаси 20-турдан кейин Уммон чемпионатида 16 жамоа орасида 14-ўринни эгаллаб турибди. Пуришкин ўтказилган 3 ўйинда 3та голга муаллифлик қилди.

 Усмон ИБОДОВ

Кўпроқ янгиликлар