Масофавий таълимда таҳсил олаётган талабаларга ҳам ўқишини кўчиришга рухсат берилади

Ўзбекистон 12:08 / 20.02.2020 12783

Олий ва ўрта махсус таълим вазирлиги энг кўп Қозоғистон, Қирғизистон ва Тожикистон ОТМдан ўқишни Ўзбекистонга кўчириш билан боғлиқ саволлар келиб тушаётганини билдирди.

Ўзбекистон таълим муассасаларига ўқишга қабул қилиш бўйича Давлат комиссиясининг қарори билан қўшни давлатлар ОТМда таҳсил олаётган Ўзбекистон фуқароларига ўқишини республика ОТМга кўчириш бўйича ариза топшириш имконияти берилди.

Вазирлик бу борада энг кўп берилаётган саволларга жавоблар эълон қилди.

Масофавий таълимдан ўқишни кўчириш мумкинми?

Давлат комиссияси баёни билан Ўзбекистон олий таълим муассасаларида мавжуд бўлмаган таълим шаклларида ўқиётган Ўзбекистон фуқароларининг ўқишини сиртқи ва кечки таълим шаклларига истисно тариқасида кўчиришга рухсат берилди. Яъни, Қозоғистон, Қирғизистон ва Тожикистон ОТМда масофавий таълимда таҳсил оладиган талабалар ҳам ўқишини Ўзбекистонга кўчириш бўйича ариза топширишлари мумкин.

Кўчириш бўйича ариза топширилди, натижаси қачон эълон қилинади?

Олий ва ўрта махсус таълим вазирлиги томонидан республика бўйлаб ташкил этилган Ҳудудий ишчи гуруҳлар томонидан аризалар умумлаштириб борилади. Мурожаатлар сони кўплигини инобатга олган ҳолда, ҳужжат қабул қилиш шу йилнинг 15 мартига қадар узайтирилди.

Фуқаролар томонидан 2020 йил 15 февралгача топширилган ҳужжатлар, 2020 йил 25 февралига қадар умумлаштирилиб, тегишли қарор қабул қилиш учун Давлат комиссиясига тақдим этилади. Жорий йил 15 мартга қадар топширилган ҳужжатлар ҳам шу тартибда кўриб чиқилади. 

Ўзбекистон таълим муассасаларига муассасаларига ўқишга қабул қилиш бўйича Давлат комиссиясининг баёни билан олий таълим муассасаларига талабаликка қабул қилиш учун тавсия қилинади.

Натижалар билан вазирликнинг расмий веб-сайти, ижтимоий тармоқлардаги саҳифалари, қолаверса, Ҳудудий ишчи гуруҳлар орқали танишиш мумкин бўлади.

Академик қарздор талабаларга ўқишни кўчиришга рухсат бериладими?

Олий таълим муассасалари талабалари ўқишини кўчириш, қайта тиклаш ва ўқишдан четлаштириш тартиби тўғрисида Низомга кўра бу ҳолатда талаба академик қарздор сифатида ўқишга қабул қилинади, яъни ўқишни кўчиришга рухсат берилади.

Талаба қайси ОТМга ўқишини кўчирган бўлса, ўша ОТМда жорий семестр давомида академик қарздорликни бартараф этиши мумкин.

Кундузги таълимга ўқишга кўчириш мумкинми?

Мумкин. Бунда Ҳудудий ишчи гуруҳ томонидан талабгорнинг таҳсил олаётган таълим йўналишидан келиб чиққан ҳолда, республикадаги ОТМ қуввати кўриб чиқилади. Агар хорижда талаба таҳсил оладиган таълим йўналиши бўйича маҳаллий ОТМда бўш жой бўлмаган тақдирда, кечки ва сиртқи таълим шакллари тавсия қилинади.

Эслатилишича, Қозоғистон, Қирғизистон ва Тожикистон олий таълим муассасаларидан ўқишини Ўзбекистонга кўчириш ихтиёрий бўлиб, Ҳудудий ишчи гуруҳлар томонидан республика ОТМ қуввати ва имкониятидан келиб чиқиб таълим шакли ва йўналиши таклиф қилинади. Якуний қарорни талаба ва унинг ота-онаси қабул қилади. 

Кўпроқ янгиликлар