O‘zbekiston Respublikasi IIV huzuridagi Tergov departamenti Andijonda sodir bo‘lgan yo‘l-transport hodisasi yuzasidan qo‘shimcha ma'lumot berdi.

2020 yil 13 fevral kuni taxminan soat 21:00larda, 24 yoshli X.M. boshqaruvidagi “Neksiya-3” rusumli avtomashinasida 3 nafar yo‘lovchi bilan birga “Andijon-Asaka” avtomobil yo‘lining “Asaka” yo‘nalishi bo‘yicha harakatlanib ketayotib, Andijon tumani, “Teraktagi” mahallasi hududida yo‘lning chekka qismida harakatsiz holda turgan 27 yoshli A.N.ning boshqaruvida bo‘lgan “Zil-130” rusumli yuk avtomashinasiga urilib, yo‘l-transport hodisasi sodir etgan.

Natijada “Neksiya-3” avtomashinasi haydovchisi X.M. va oldi yo‘lovchi o‘rindiqdagi yo‘lovchi 24 yoshli I.J. hodisa sodir bo‘lgan joyida,  yo‘lovchilar 24 yoshli M.B. va 20 yoshli N.P. esa ko‘rsatilgan tibbiy muolajalarga qaramasdan shifoxonada vafot etgan.

Mazkur holat yuzasidan Andijon viloyati IIB huzuridagi Tergov boshqarmasi tomonidan Jinoyat kodeksining 266-moddasi 3-qismi “a” bandi (Odamlar o‘limiga sabab bo‘lgan transport vositasini boshqaruvchi shaxs tomonidan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Dastlabki tergov harakatlari davom ettirilmoqda.