Тергов департаменти: Андижондаги ЙТҲ оқибатида яна икки киши шифохонада вафот этди

Жамият 12:08 / 14.02.2020 10331

Ўзбекистон Республикаси ИИВ ҳузуридаги Тергов департаменти Андижонда содир бўлган йўл-транспорт ҳодисаси юзасидан қўшимча маълумот берди.

2020 йил 13 февраль куни тахминан соат 21:00ларда, 24 ёшли Х.М. бошқарувидаги “Нексия-3” русумли автомашинасида 3 нафар йўловчи билан бирга “Андижон-Асака” автомобиль йўлининг “Асака” йўналиши бўйича ҳаракатланиб кетаётиб, Андижон тумани, “Терактаги” маҳалласи ҳудудида йўлнинг чекка қисмида ҳаракатсиз ҳолда турган 27 ёшли А.Н.нинг бошқарувида бўлган “Зил-130” русумли юк автомашинасига урилиб, йўл-транспорт ҳодисаси содир этган.

Натижада “Нексия-3” автомашинаси ҳайдовчиси Х.М. ва олди йўловчи ўриндиқдаги йўловчи 24 ёшли И.Ж. ҳодиса содир бўлган жойида,  йўловчилар 24 ёшли М.Б. ва 20 ёшли Н.П. эса кўрсатилган тиббий муолажаларга қарамасдан шифохонада вафот этган.

Мазкур ҳолат юзасидан Андижон вилояти ИИБ ҳузуридаги Тергов бошқармаси томонидан Жиноят кодексининг 266-моддаси 3-қисми “а” банди (Одамлар ўлимига сабаб бўлган транспорт воситасини бошқарувчи шахс томонидан транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Дастлабки тергов ҳаракатлари давом эттирилмоқда.

Кўпроқ янгиликлар