Адолат саховатпеша инсонлар кўмагига муҳтож - унинг юраги оғир хаста

Жамият 13:41 / 14.02.2020 5938

Адолат Аллаярова 1994 йилда туғилган, ота-онаси билан Ҳазорасп туманида яшамоқда. У юрак нуқсони билан туғилган, аммо касаллик жуда кеч, 15 ёшида аниқланган.

«Қизим жуда нимжон бўлиб улғайди. Тез-тез ҳолсизланиб қолар, оддий уй ишларини ҳам қилолмасди. Афсуски бунга эътибор қилмаган эканмиз. Дангасаликдан хархаша қиляпти деб ўйлар эдик. 15 ёшида бирдан мазаси қочиб қолди. Шундан сўнг, кардиолог шифокор унда туғма юрак бўлмачалараро тўсиқ девори нуқсони борлигини аниқлади», - деди онаси Ойгул.

Шундан сўнг, Адолат ревматолог ва кардиолог назоратига қўйилган, амбулатория ва стационар шароитида мунтазам даволанган. Шифокорлар унда юрак туғма нуқсонига ёндош касаллик сифатида ўпка артерияси гипертензияси ҳам борлигини аниқлашган. 

Оғир хасталиги туфайли Адолат мактабда ҳам муттасил таълим ололмаган.

«Хасталиги туфайли мактабга онда-сонда борар эди. Кейинчалик ҳолсизланиб қолди ва бормай қўйди, ўқишни ҳам тугатолмади. Рўзғор ташвишлари, тирикчилик ташвишида бўлиб, уни даволатиш имкониятини тополмадик» - деди онаси Ойгул.

Қайд қилиш жоизки, бу оила ночор ва кам таъминланганлар рўйхатида туради. Хонадонга кириб боришимиз билан ночорлик бор бўйи билан намоён бўлаётганини кўрдик, ҳис қилдик. Оила боши Отабобо Сайдаметов бозорда аравакашлик қилади. Ойгул Аллаярова мардикорлик билан пул топади. Оилада яна 3 фарзанд вояга етмоқда. Адолатнинг ўзига 2-гуруҳ ногиронлиги берилган ва 450 минг сўм пенсия тайинланган. Бу маблағ қизнинг кундалик дориларига, эҳтиёжига аранг етади холос.

Ҳозирги вақтда 26 ёшли Адолат тўшакдан деярли турмайди. Сал ҳаракатда ҳансираб қолади, юраги тез-тез уради, ҳаво етишмаслигидан, боши айланиши, қулоғи шанғиллашидан, қўл-оёқларидаги оғриқдан, умумий ҳолсизликдан азият чекмоқда. Унга синглиси ва онаси навбатма-навбат қараб туришибди.

Адолатнинг шифо топиши, яна нормал ҳаётга қайтиши учун имконият бор. Бунинг учун у жарроҳлик амалиётидан ўтиши керак. Республика ихтисослаштирилган кардиология илмий-амалий тиббиёт маркази Урганч филиалидаги жарроҳлик амалиёти, ундан олдинги муолажалар, таҳлилларни топшириш, жарроҳлик амалиётидан тикланиб олиш жараёни учун 25 миллион сўм талаб қилинади.

Kuz.uz’нинг хайр-эҳсонни хуш кўрувчи, савобталаб, саховатпеша ўқувчилари, Адолатнинг шифо топиб, хасталикдан фориғ бўлишига ҳиссамизни қўшайлик. Унинг ва ота-онасининг хурсандчилигига шерик бўлайлик. Ҳар ким имкони даражасида ёрдам қўлини чўзса, тома-тома кўл бўлганидек, Адолат учун ҳам зарур маблағ саноқли кунларда тўпланишига шубҳа қилмаймиз. Имкони йўқлар эса ғойибона дуоларида шифо тилаб қўйсалар, шу орқали маънавий ёрдам берган бўладилар.

Адолат Аллаярованинг онаси Ойгул Аллаярованинг пластик карта рақами:

8600 0609 4590 1313

(PAYME ва Click, Халқбанки)

Халқ банки Ҳазорасп тумани филиали

МФО: 00813

ИНН: 200418153

Халқ банки кассалари орқали нақд пул топширганда:

2311 6000 8000 0081 3100

Бошқа ташкилотлардан келиб тушган маблағлар транзити:

2312 0000 2000 0081 3100

Kun.uz мухбири Нурмуҳаммад Саид тайёрлади

Кўпроқ янгиликлар