«Монополия тугатилишини аниқ айта оламиз». Ўзбекистон авиацияси беш йилдан кейин қандай бўлади? 

Ўзбекистон 16:49 / 12.02.2020 32048

Бугун, 12 феврал куни, Ўзбекистонда ўтказиладиган халқаро авиация форуми бўйича матбуот анжумани бўлиб ўтди. Унда иштирок этган туризм ва транспорт соҳаси расмийлари Ўзбекистоннинг авиация тизимида яқин 5 йилда бўладиган ўзгаришлар ҳақида маълумот беришди.

Транспорт вазири Элёр Ғаниевнинг айтишича, келгуси беш йилда авиация бозорида рақобат муҳити кучаяди.

Элёр Ғаниев

“Биринчи навбатда рақобатни кучайтирамиз. Ўзбекистонга парвозни амалга оширувчи авиакомпаниялар сонини ошириш режалаштирилган. Шунингдек, йўловчи ташиш кўрсаткичларини камида 2-3 бараварга кўпайтириш кўзланмоқда”, − дейди у.

Элёр Ғаниев мамлакатда авиамонополияга буткул чек қўйилишини айтди.

“Ҳозиргача авиация тизимида мавжуд бўлиб келган монополиянинг буткул тугашини аниқ ишонч билан айта оламан. Янги авиакомпаниялар ташкил этишда давом этилади. Камида 5-6 та янги авиаташувчи ташкил этилади”, дея таъкидлайди транспорт вазири. 

“Шу билан бирга, авиация юк ташиш бўйича ҳам ўз имкониятларидан максимал даражада фойдалана бошлайди. Бу борада ҳам ҳабларни ташкил этиш бўйича ишланмоқда. Энг муҳими, чипталарнинг нархи арзонлашади. 

Ўзбекистон қитъанинг марказида жойлашган. Ҳар қандай йўналишдаги парвозлар Ўзбекистон орқали ўтиши мумкин. Мамлакатни минтақадаги авиацион ҳабга айлантириш асосий мақсаддир”, − дея баён қилди Элёр Ғаниев.

Бош вазир ўринбосари, Туризмни ривожлантириш давлат қўмитаси раиси Азиз Абдуҳакимовнинг билдиришича, авиахизматлар кўрсатишда IT технологиялар жорий қилинади.

“Яқин бир ой ичида йўловчиларнинг авиарейсларга регистрацияни ўз смартфонидан амалга ошириши йўлга қўйилади. Шунингдек, чипталар харидини онлайн платформалар орқали амалга ошириш мумкин бўлади. Бу тизим самолётлар учун ишлаяпти, энди поезд ва автобуслар учун ҳам жорий қилинади”, − дейди Азиз Абдуҳакимов. 

Бош вазир ўринбосарига кўра, мамлакатда барча транспорт турларини бирлаштирувчи тизим яратилади.

“Авиация, темирйўл, автобус − барча транспорт воситалари ўзаро боғланадиган ягона тизим ишга туширилади. Мисол учун, хорижий меҳмон ҳали Ўзбекистонга келмасдан аввал ўзи учун керакли маршрутни танлаб, битта билет сотиб олиши мумкин. Ўзининг авиарейсидан келиб чиқиб, мамлакат ичида мос поезд ёки автобус қатновини ҳам белгилаб олади”, − дея қўшимча қилди у.

Кўпроқ янгиликлар