Таиланддаги савдо маркази биносидан ўнлаб одамларни ўлдирган аскар ҳам, гаровдагилар ҳам топилмади 

Жаҳон 00:08 / 09.02.2020 20231

Таиланд махсус хизмати Terminal 21 савдо марказининг асосий биносидаги барча тўртта қаватни текшириб чиқди ва 20 кишини отиб ўлдирган аскарни ҳам, гаровдагиларни ҳам тополмади. Бу ҳақда «Кхаосот» газетаси хабар бермоқда.

Савдо маркази биноси бир неча қисмдан иборат.

Аввалроқ Накхонратчасима шаҳрида ўндан ортиқ кишини отиб ўлдирган аскар Жакрапант Тхомма савдо марказига яшириниб олгани ва 16 кишини гаровга олгани хабар қилинганди.

Жакрапант Тхомма / фото: Facebook

Маълумот берилишича, Тхомма дастлаб ҳарбий қисмда ўз командири ва икки кишини отиб ташлаган, сўнгра у ердаги ҳарбий машинага ўтириб қочиб кетган. У Муанг районидаги «Терминал-21» савдо марказига йўл олган ва у ерга етиб боргунча йўлида учраган ўткинчиларни ўққа тутган. Аввалроқ қурбонлар сони 12 нафар эканлиги айтилганди. Охирги маълумотларга кўра, отишма натижасида 20 киши ҳалок бўлган, 31 киши жароҳатланган.

У савдо марказидаги ҳаракатларини Facebook орқали жонли тарзда намойиш этган. Орадан бир оз вақт ўтиб унинг саҳифаси блокланган.

Хизматдошларининг айтишларича, у ҳарбийлар орасида ўтказилган мусобақаларда энг яхши мерган деб топилган. Тхомма ҳарбий қисмдан ўзи билан бирга ўнлаб ўқотар қуроллар ва ўқ-дориларни олиб кетгани айтилмоқда.

Кўпроқ янгиликлар