Америка армияси қўмондонлиги Суриянинг шарқий ва шимоли-шарқий ҳудудларида янги ҳарбий объектлар қурмоқда, деб хабар берди Anadolu агентлиги.

Агентликнинг маълумот беришича, Сурияда кейинги ойларда АҚШ ва Россия ўртасида қарама-қаршилик кузатилаётгани боис америкаликлар Телл-Брак шаҳри ҳудудида шошилинч равишда ҳарбий база қуришни бошлаган. Румейлан нефть конларига олиб борувчи трасса мазкур аҳоли масканини кесиб ўтади.

АҚШ қуролли кучлари қўмондонлиги база қуриш мақсадида Ироқдан Сурияга қурилиш техникаси ва хом ашёларини келтирган. Телл-Бракнинг шимолий қисмидаги қурилиш ишлари 3 февралдан буён давом этмоқда.

Бундан ташқари, нефтга бой Дайр-аз-Зор вилоятида жойлашган америкалик ҳарбийлар Хасеке шаҳри марказидаги бинолардан бирини ҳарбий объектга айлантиришни бошлаган.  

АҚШ ҳарбийлари «Тинчлик булоғи» операцияси бошланганидан сўнг Суриядаги айрим базаларини тарк этган ва нефть конлари жойлашган ҳудудларга кўчиб ўтганди.