«Baxt» sport-sog‘lomlashtirish majmuasining tashkiliy-huquqiy maqomi belgilanadi

Davlat bojxona qo‘mitasi tomonidan “Baxt” sport-sog‘lomlashtirish majmuasida qo‘mitaning budjetdan tashqari mablag‘lari hisobidan qayta qurish va kapital ta'mirlash ishlari yakunlandi. Bu haqda Vazirlar Mahkamasining muhokama uchun e'lon qilingan hujjati loyihasida aytilgan.

Qayd etilishicha, sport-sog‘lomlashtirish majmuasining tashkiliy-huquqiy maqomini belgilash, shuningdek, ushbu obektni kelgusida saqlash va faoliyatini moliyalashtirish bo‘yicha choralar belgilanadi:

Davlat bojxona qo‘mitasining mazkur obektga “Baxt” sport-sog‘lomlashtirish majmuasi” Davlat unitar korxonasi shaklidagi yuridik shaxs maqomi (DUK) berish to‘g‘risidagi taklifiga rozilik beriladi.

Belgilanishicha:

DUK direktori Davlat bojxona qo‘mitasi raisining buyrug‘i asosida lavozimga tayinlanadi va ozod etiladi;

DUK xodimlarining shtat birliklari va ish haqi miqdorlari DUK direktori tomonidan O‘zbekiston Respublikasi Davlat bojxona qo‘mitasi bilan kelishilgan holda tasdiqlanadi.

DUKning asosiy vazifalari etib quyidagilar belgilanadi:

majmuani samarali boshqarish va ishlatish;

bojxona organlari xodimlari va ularning oila a'zolari, shuningdek pensionerlari uchun pullik asosda sog‘lomlashtirish va dam olish tadbirlarini tashkil etish;

sport, ko‘ngilochar va tantanali marosimlarni tashkil etish va o‘tkazish bo‘yicha tijoriy xizmatlarni ko‘rsatish.

DUKni moliyalashtirish quyidagilar hisobidan amalga oshiriladi:

majmua tomonidan xizmatlar ko‘rsatishdan, tijorat faoliyatini amalga oshirishdan, shuningdek, majmuaga biriktirilgan bino, inshootlar va boshqa mol-mulklarni ijaraga berishdan olinadigan daromadlar;

jismoniy va yuridik shaxslarning homiylik xayriyalari;

qonun hujjatlarida taqiqlanmagan boshqa manbalar.

O‘zbekiston Respublikasi Davlat bojxona qo‘mitasi DUKning Ustavini tasdiqlaydi, shuningdek uning davlat ro‘yxatidan o‘tkazilishini ta'minlaydi.