Ўзбекистонда вазирликлар ишини баҳолашнинг рейтинг тизими жорий қилинади

Ўзбекистон 18:48 / 21.01.2020 5139

Ўзбекистонда ижро ҳокимияти органлари фаолиятига баҳо беришнинг рейтинг тизими жорий этилиши кутилмоқда. Бу ҳақда президент Шавкат Мирзиёев 21 январь куни Олий Мажлис палаталарининг қўшма мажлисида айтиб ўтди.

Давлат раҳбарининг сўзларига кўра, янги тизимни халқаро рейтинг ва индекслар кўрсаткичлари билан уйғунлаштириш лозим.

«Рейтинг қилишимиз керак. Ҳозирча бу тизим бизда йўқ. Кимдир нимадир иш қилиб қўйса, уни мақтаймиз. Ҳа, бу вилоят зўр деймиз. Бундай бўлиши керак эмас. Бу абстракт. Ҳаммаси аниқ бўлиши керак. Аниқ бўлиши учун эса рейтинг бўлиши керак. Ижтимоий тармоқларда чиқариб қўйинглар бу натижаларни, ҳамима билиши керак.

Ҳар бир вилоят, ҳар бир туман билсин ўзини ишини. Ана шунда адолат бўлади, ким биринчи, ким юзинчи», – деди Шавкат Мирзиёев.

Президент бу борада бош вазир Абдулла Ариповга тегишли топшириқлар берди:

«Сиз шу соҳани мутахассисисиз. Ижро органидаги ҳамма вазирларингизга шу рейтинг тизимини жорий қилинг. Бу ерда ўтирган вазирларингиз баланпарвоз гапларни гапирмасин».

Шавкат Мирзиёев, шунингдек, мамлакатнинг халқаро рейтинг кўрсаткичларини яхшилаш муҳимлигини таъкидлаб, Жаҳон банкининг ўтган йилги давлат бошқаруви индикатори ҳисоботларида Ўзбекистон бешта кўрсаткич бўйича ўз ўрнини яхшилаганига эътибор қаратди.

«Умуман олганда, ривожланиш индексини ишлаб чиқиш вақти келди. Ҳукумат мазкур индексдан келиб чиқиб, ҳудудларга оид сиёсатни белгилаши, маҳаллий бюджетларга молиявий кўмак бериши ҳамда раҳбарларни рағбатлантириш масалаларини пухта кўриб чиқиши керак. Хусусан, тадбиркорликни ривожлантириш учун қайси ҳудудда инфраструктура етишмаяпти, банк ресурслари ва субсидиялар қайси бирига кўпроқ керак, деган саволларга жавобни ана шу индекс кўрсатиб беради.

Кимдир кимгадир ёқса, у зўр бўлиши керак эмас. Баҳолаш аниқ бўлиши керак», – деган Шавкат Мирзиёевнинг сўзларини келтирмоқда Kun.uz мухбири.

Кўпроқ янгиликлар