Вазирлар Маҳкамасининг “Ўзбекистон Республикасининг Бирлашган Араб Амирликларининг Абу-Даби шаҳридаги Элчихонаси бинолар комплексини қуриш ва жиҳозлаш бўйича ташкилий чора-тадбирлар тўғрисида”ги қарори қабул қилинди.
Қайд этилишича, Ўзбекистон ҳукумати билан Бирлашган Араб Амирликлари ҳукумати ўртасида 2019 йил 25 мартда Абу-Даби шаҳрида имзоланган, Ўзбекистоннинг Бирлашган Араб Амирликларидаги элчихонасини жойлаштириш учун ер участкасини тақдим этиш тўғрисидаги битимни амалга ошириш мақсадида, Ўзбекистонга Абу-Даби шаҳрида Ўзбекистоннинг элчихонаси бинолари комплексини қуриш ва жиҳозлаш учун Абу-Даби шаҳри, дипломатик тумани, Ғарбий Ҳавзада (W59/2) жойлашган умумий майдони 5575 кв.м бўлган 9-сонли ер участкаси ажратилган.
Ўзбекистон Ташқи ишлар вазирлигининг 2020-2021 йилларда Ўзбекистоннинг Бирлашган Араб Амирликларидаги элчихонасининг элчихона биноси, консуллик масалалари бўйича фуқароларни қабул қилиш учун алоҳида бино, элчи учун қароргоҳ, назорат-ўтказиш пунктлари, муҳандислик-техник блок, спорт иншоотлари, 6та машина учун ёпиқ гараж, элчихона ходимлари ва ташриф буюрувчилар учун очиқ автотурар жой каби объектлардан иборат бинолари комплексини қуриш ва жиҳозлаш тўғрисидаги таклифига розилик берилди.
Комплексни қуриш ва жиҳозлаш доирасида:
Ташқи ишлар вазирлиги - буюртмачи;
“ЎзшаҳарсозликЛИТИ” ДУК - бош лойиҳачи ташкилот;
“Трест-12” АЖ - бош пудратчи ташкилот;
2022 йил 1 декабрь - фойдаланишга топшириш муддати этиб белгиланди.
Ташқи ишлар вазирлиги:
суғурта ташкилоти билан комплексни қуриш ва жиҳозлашга жалб этиладиган шахслар Бирлашган Араб Амирликлари ҳудудида бўлиш даврида уларнинг ҳаёти ва соғлиғини суғурталаш шартномаси ҳамда комплексни қуриш ва жиҳозлаш даврида қурилиш хавфларини суғурталаш шартномалари тузилишини;
бош лойиҳачи ва пудратчи ташкилотларга комплексни қуриш ҳамда жиҳозлаш давомида сафарбарлик ишларини ташкил этишга кўмаклашишни;
комплексни қуриш бўйича шаҳарсозлик ҳужжатларини ишлаб чиқилиши ва ваколатли органларда экспертизадан ўтказилишини белгиланган тартибда таъминлайди.
Бош пудратчи ташкилотга Абу-Даби банкларида ҳисобварақлар очиш ва ажратилган маблағлар доирасида хорижий валютани белгиланган тартибда харид қилиш ҳамда тасдиқловчи ҳужжатлар мавжуд бўлганда, валюта маблағларини комплексни қуриш ва жиҳозлаш билан боғлиқ харажатларни қоплаш (Бирлашган Араб Амирликлари ҳудудида ундириладиган йиғимлар, солиқлар ва тўловлар, шунингдек, товарлар ва хизматлар) учун кейинчалик ушбу ҳисобварақларга ўтказишга рухсат берилди.
Буюртмачи ва бош пудратчи ташкилотга валюта маблағларидан мақсадли ва оқилона фойдаланиш бўйича масъулият юкланди.
Белгилаб қўйилишича, комплексни қуриш ва жиҳозлаш ишлари якунлангач, шунингдек, Абу-Даби банкларидаги ҳисобварақлар ёпилгандан сўнг бош пудратчи ташкилот фойдаланилмай қолган валюта маблағларини Давлат бюджетига қайтариш учун буюртмачига қайтариб беради.
Ташқи ишлар вазирлиги бош лойиҳачи ва бош пудратчи ташкилот билан биргаликда икки ой муддатда Бирлашган Араб Амирликларининг қурилиш меъёрлари ва стандартларига мувофиқ тегишли лойиҳа ва қурилиш-монтаж ҳужжатларини ишлаб чиқиш учун Амирликнинг муҳандислик компанияси белгиланган тартибда жалб қилинишини таъминлайди.
Давлат божхона қўмитаси комплексни қуриш ва жиҳозлаш ишлари учун олиб чиқиладиган зарур қурилиш техникаси, машиналар ва механизмлар, қурилиш материаллари, ускуна ҳамда бошқа товарларнинг белгиланган тартибда тезкор божхона расмийлаштирувини амалга оширади.
“Ўзбекистон темир йўллари” АЖ ва Uzbekistan Airways АЖ буюртмачи, бош пудратчи ва бош лойиҳачи ташкилотларнинг буюртманомалари бўйича:
комплексни қуриш ва жиҳозлаш учун қурилиш техникаси, машиналар ва механизмлар, қурилиш материаллари, ускуналар ва бошқа товарларни Ўзбекистон ҳудуди бўйлаб ва транзит мамлакатлар орқали Абу-Даби шаҳрига ташиб бориш ва қайтариб олиб келишни таъминлайди. Заруратга кўра, чартер ҳаво юк ташувини ташкил этишни назарда тутади;
комплексни лойиҳалаштириш, қуриш ва жиҳозлаш ишларини бажаришга жалб этиладиган шахслар учун ҳаракатланиш ҳужжатлари брон қилиниши ва сотиб олинишини таъминлайди.
