Livan keyingi ikki yil davomida a'zolik badalini to‘lamaganligi sababli BMT Bosh assambleyasida ovoz berish huquqidan mahrum qilindi. Bu haqda Livan tashqi ishlar vazirligi bayonotida ma'lum qilindi.

Vazirlik bu borada taassuf bildirdi va Livandagi mas'ullarga zarur so‘rovlarni yuborganini ma'lum qildi.

"Ushbu holatda Livanning manfaatlari va nufuziga putur yetdi. Bu masala yaqin vaqt ichida hal etilishiga umid qilamiz", — deyiladi vazirlik tomonidan.

Ma'lum bo‘lishicha, Livan tashqi ishlar vaziri Jabron Basil moliya vaziri Ali Hasan Xalilga bir necha bor murojaat qilgan. Vazirlik o‘tgan yili qarzlarni to‘lash uchun 1,31 million dollar so‘ragan.

Livanda iqtisodiy va moliyaviy vaziyat yomonlashishda davom etmoqda. Prezident Mishel Aun oktabr boshida mamlakat moliyaviy qamal va sanksiyalardan aziyat chekayotganligini ma'lum qilgandi.