Gap shaharning hozirgi qozoqcha nomlanishi - Almatidan sobiq ittifoq davridagi nomi – Alma-Ataga o‘zgartirilishi haqida bormoqda.

Qozog‘iston prezident Qosim Jo‘mart-To‘qayev shahar aholining fikri inobatga olinmagan holda qayta nomlanmasligiga va'da berdi. Prezident shu tariqa yozuvchi O‘ljas Suleymenovning shaharning qayta nomlanishi g‘oyasini go‘yoki qo‘llab-quvvatlagani haqidagi so‘zlariga izoh berdi. 

To‘qayevning aytishicha, ayni vaqtda shaharni rivojlantirish bo‘yicha dolzarbroq masalalarga e'tibor qaratish lozim.

Olma-ota ma'muriyatida ham shahar nomini o‘zgartirish masalasi kun tartibida yo‘qligi aytilgan. Ayni vaqtda shaharni 2050 yilgacha rivojlantirish strategiyasi ustida faol ish olib borilmoqda.

Avvalroq Suleymenov uning Olmaotaga tarixiy nomi qaytarilishi g‘oyasini To‘qayev qo‘llab-quvvatlaganini ma'lum qilgan. 

“Prezident To‘qayev bilan uchrashganimda biz bu masalani muhokama qildik va u ushbu tashabbusni qo‘llab-quvvatladi. Biroq buni xalqning o‘zi hal qilishi kerakligini aytdi. Meni shahar hokimi Baqitjon Sag‘intayev ham qo‘llab-quvvatladi”, deb aytgan yozuvchi.

Qozog‘istonda Janubiy poytaxtga Alma-ata nomi qaytarilishi masalasi bot-bot ko‘tarilib turadi. Shaharning qayta nomlanishi tarafdorlari “Alma-ata” nomida olmaning aport turi vujudga kelgan Olmaotaning o‘ziga xosligi ko‘rinib turishini ta'kidlashadi.   

Shaharga avvalgi nomining qaytarilishiga qarshi chiquvchilar esa har qanday qayta nomlash o‘z ortidan budjet mablag‘laridan qo‘shimcha xarajatlarga olib kelishini ta'kidlashadi. Shu sababli ular shaharning nomini o‘zgartirmaslik kerak, deb hisoblashadi.