Америкалик ёшлар нега кўпроқ Швецияда ўқишни хоҳлайди?

Lifestyle 21:38 / 13.12.2019 8991

АҚШга ўқиш учун бориш – дунёнинг кўплаб давлатларидаги ёшларнинг орзуси. Лекин Американинг ўзидаги кўплаб талабалар Швецияда таълим олишни афзал кўришяпти.

Нима учун, деган саволга TheLocal.de сайтидаги мақолада жавоб бериб ўтилган.

Нархлар арзонроқ

АҚШда бакалавр дипломини олиш сизга ўртача 100 минг долларга тушиши мумкин. Магистратурада ўқиш нархи эса тахминан 30 мингдан 120 минг долларгача.

Швецияда таҳсил олиш эса нисбатан арзонроқ. Боз устига, бу ерда халқаро талабалар учун стипендиялар ҳам бор (АҚШда стипендия берилмайди). Стипендиялар одатда ўқиш тўловларини 50 фоизгача камайтиради.

Янада мустақил ҳаёт

Швеция ва АҚШ таълим тизими ўртасидаги асосий фарқ шундаки, скандинавлар юртида университетлар талабаларнинг ижтимоий ҳаётига кўпроқ аҳамият қаратади. Талабалар учун бўш вақтларида ҳар хил экскурсиялар ташкил этиб турилади.

Бундан ташқари, Швеция университетларида ўқув дастуридан қатъи назар ҳар доим мустақил фикрлашга эътибор қаратилади.

Глобал таълим

Швед университетларининг устунлик тарафларидан яна бири – ҳар бир муаммога глобал тарзда ёндашишдир.

Американинг кўплаб ОТМларида ўқув дастурлари мамлакат манфаатидан келиб чиқиб яратилади, Швецияда эса умуминсоний қадриятлар ва глобализм асосида таълим берилади.

Стресс камроқ

Албатта, университетда ўқиш истироҳат боғида мазза қилиб юриш дегани эмас. Швецияда ҳам шундай, лекин бу ердаги таълим тизимида стресс даражаси пастроқ.

Мисол учун, талаба ва профессор муносабатларида расмиятчилик камроқ. Ўқув йилининг тақсимланиши ҳам талабаларга босимни камайтиради.

«АҚШда ўқув йилининг маълум қисмида кунига бешталаб дарс соатлари бўлиши одамни чарчатади. Швецияда эса муддатлар яхшироқ тақсимлаб чиқилган, бунинг натижасида талаба бир вақтда битта нарсага диққат қарата олади», – дейди Оҳайо штатидан бўлган талаба Адам Грачек.

Европа учун зинапоя

Швеция университетларида таълим олиш Европада яшаш ва ишлаш имкониятлари эшигини очиб беради.

Америкадан фарқли ўлароқ, Швецияда 25 кунлик меҳнат таътилини олиш мумкин. Қолаверса, бу ерда фарзанд кўрган ота-онага ҳақ тўланадиган, умумий 480 кунлик таътил берилади.

Кўпроқ янгиликлар