Шимолий Корея АҚШ билан ядровийсизлаш масаласини бошқа муҳокама қилмаслигини маълум қилди 

Жаҳон 08:26 / 08.12.2019 9453

Шимолий Кореянинг БМТдаги вакили Ким Сонг Корея яриморолини ядровийсизлаш масаласи АҚШ билан бошқа муҳокама қилинмаслигини айтди. Бу ҳақда Reuters ахборот агентлиги хабар берди.

Дипломатнинг таъкидлашича, Вашингтон интилаётган мулоқот ўз ички сиёсий мақсадлари йўлида “вақтдан ютиш учун найранг” бўлган ва 2020 йилги АҚШ президенти сайловларига тааллуқли ҳисобланади. 

“Бизга АҚШ билан узоқ кечувчи музокаралар керак эмас, ядровийсизлаш эса бошқа муҳокама қилинмайди”, деб айтган Ким Сонг. Аввалроқ Шимолий Корея ташқи ишлар вазирлиги АҚШни ўзининг “душманона сиёсатини” ўзгартиришга чақирганди. 

АҚШ президенти Дональд Трамп бунга жавобан Пхеньяннинг нодўстона баёнотларидан таажжубда эканлигини айтган.

“Шимолий Корея душманона ҳаракат қилса, ажабланган бўлардим. У [Ким Чен Ин] менда сайловлар бўлишини билади. У бунга аралашишни истайди, деб ўйламайман. Ўйлашимча, у нимадир юз беришини истайди. Муносабатларимиз жуда яхши, бироқ муайян адоват бор, бунга шубҳа йўқ”, деб айтган Трамп.  

Ким Чен Ин апрелда АҚШда йил охиригача Шимолий Кореяга нисбатан ёндашувни ўзгартириш учун вақт борлигини ва Трамп билан Ханойдаги охирги муваффақиятсиз учрашувга қарамай, яна бир бор музокаралар ўтказиб кўрмоқчилигини айтган.

Кўпроқ янгиликлар