8 декабрга ўтар кечаси бутун дунё бўйлаб минглаб одамлар The World's Big Sleep Out тадбири доирасида тунни кўчада ўтказишди. 

Улар ўз олдиларига шу тариқа бошпанасизларга ёрдам учун маблағ йиғишни мақсад қилишган. Бу ҳақда “Би-би-си” телеканали хабар берди. 

Тадбир ташкилотчиларининг баҳолашича, акцияда 50 мингга яқин одам иштирок этиши керак эди. Британияда Лондон, Эдинбург ва Кардиффда одамлар тунни кўчада ўтказишган. Шунингдек, бундай тадбирларни Нью-Йорк (АҚШ), Брисбен (Австралия), Дублин (Ирландия) ва бошқа шаҳарларда ўтказиш режалаштирилганди. 

Фаоллар тадбир орқали бошпанасизлар учун 38 млн фунт стерлингга (50 млн доллар) яқин маблағ йиғишни мақсад қилишган.

World's Big Sleep Out акцияси асосчиси Жош Литтлжон ҳисобланади. Ташкилот сайтида таъкидланишича, акциядан мақсад нафақат маблағ йиғиш, балки сиёсий етакчиларнинг бошпанасизлар ва қочқинлар муаммосига эътиборини жалб қилишдан иборат.