Вазирлар Маҳкамасининг регламентига ўзгартириш киритилади

Ўзбекистон 10:13 / 03.12.2019 8557

Ўзбекистон Республикаси Вазирлар Маҳкамасининг регламентига ўзгартириш ва қўшимча киритилади. Ҳукуматнинг тегишли қарори лойиҳаси муҳокама учун эълон қилинди.

Вазирлар Маҳкамасининг регламенти 33-бандига қуйидаги мазмундаги олтинчи хатбоши қўшилади:

“Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси билан – таълим соҳасига оид лойиҳалар;”;

олтинчи – ўн тўртинчи хатбошилар тегишлича еттинчи – ўн бешинчи хатбошилар деб ҳисобланади.

Эслатиб ўтамиз, 33-бандга кўра ишлаб чиқувчи томонидан тайёрланган Ўзбекистон Республикаси Президенти ва Вазирлар Маҳкамасининг ҳужжатлари лойиҳалари манфаатдор вазирликлар ва идоралар билан келишилиши керак.

Амалдаги таҳрири қуйидагича:

Ўзбекистон Республикаси Иқтисодиёт ва саноат вазирлиги билан — барча лойиҳалар, шу жумладан, ривожлантириш давлат дастурлари ва инвестиция дастурларига оид лойиҳалар, уларни келишишнинг якуний босқичида ҳуқуқий экспертиза ўтказиш учун Ўзбекистон Республикаси Адлия вазирлигига киритишдан олдин;

Ўзбекистон Республикаси Молия вазирлиги билан — Ўзбекистон Республикаси Давлат бюджетидан ва давлат мақсадли жамғармалари бюджетларидан маблағлар ажратиш, шунингдек, давлат харидларини амалга ошириш масалаларига оид лойиҳалар;

Ўзбекистон Республикаси Инвестициялар ва ташқи савдо вазирлиги билан — инвестициялар, савдо ва иқтисодий тартибга солиш масалаларига оид лойиҳалар;

Ўзбекистон Республикаси Маданият вазирлиги билан — моддий маданий мерос объектларига оид лойиҳалар;

Ўзбекистон Республикаси Президенти ҳузуридаги Лойиҳа бошқаруви миллий агентлиги билан — давлат бошқарувида ахборот тизимлари, ресурслари ва бошқа дастурий маҳсулотларни яратиш ва жорий этиш масалаларига оид лойиҳалар;

Ўзбекистон Республикаси Молия вазирлиги ҳузуридаги Давлат-хусусий шерикликни ривожлантириш агентлиги билан — давлат-хусусий шериклик масалаларига оид лойиҳалар;

Ўзбекистон нодавлат нотижорат ташкилотлар миллий ассоциацияси билан — нодавлат нотижорат ташкилотларнинг ҳуқуқлари ва қонуний манфаатларига оид лойиҳалар;

Ўзбекистон фермер, деҳқон хўжаликлари ва томорқа ер эгалари кенгаши билан — фермер, деҳқон хўжаликлари ва томорқа ер эгаларининг ҳуқуқлари ва қонуний манфаатларига оид лойиҳалар;

Ўзбекистон Республикаси Савдо-саноат палатаси билан — тадбиркорлик фаолиятини амалга оширишга бевосита ёки билвосита таъсир қилувчи масалаларга оид лойиҳалар;

Ўзбекистон Республикаси адвокатлар палатаси билан — адвокатлик фаолияти ва суд ишларини юритиш масалаларига оид лойиҳалар мажбурий тартибда келишилади.

Ўзбекистон Республикаси Президенти, Вазирлар Маҳкамасининг ҳужжатлари лойиҳалари қонун ҳужжатларида назарда тутилган ҳолларда бошқа давлат органлари ва ташкилотлар билан ҳам мажбурий тартибда келишилади.

Ўзбекистон Республикаси Президенти ва Вазирлар Маҳкамаси ҳужжатлари лойиҳаларини келишиш Ўзбекистон Республикаси Президенти ва Вазирлар Маҳкамасининг ҳужжатларида белгиланган тартибда электрон шаклда ҳам амалга оширилиши мумкин.

Кўпроқ янгиликлар