Paxtachilik-to‘qimachilik klasterlarida chorvachilik komplekslari tashkil etiladi 

Paxtachilik-to‘qimachilik klasterlarida chorvachilik komplekslari tashkil etiladi. Prezidentning bu haqdagi qarori loyihasi muhokama uchun joylashtirildi.

O‘zbekiston Respublikasi Veterinariya va chorvachilikni rivojlantirish davlat qo‘mitasi, “O‘zto‘qimachiliksanoat” uyushmasi va Qoraqalpog‘iston Respublikasi Vazirlar Kengashi, viloyatlar hokimliklarining Paxtachilik-to‘qimachilik klasterlarida chorvachilik komplekslarini tashkil etish haqidagi takliflariga rozilik berilishi mumkin.

Belgilab qo‘yilishicha:

paxtachilik-to‘qimachilik klasterlarida tashkil etiladigan chorvachilik komplekslaridagi chorva mollari uchun ozuqa bazasini mustahkamlash hamda  almashlab ekish tizimini joriy qilish maqsadida paxtachilik-to‘qimachilik klasterlari ekin yer maydonining 10 foiz qismiga ozuqabop ekinlar, jumladan beda, makkajo‘xori, xashaki lavlagi va boshqa ekinlar joylashtirishga ruxsat etiladi;

paxtachilik-to‘qimachilik klasterlariga chorvachilik komplekslarini tashkil etish va ulardagi chorva mollarining ozuqa bazasini mustahkamlash uchun qo‘shimcha ravishda qishloq xo‘jaligida foydalanilmayotgan sug‘oriladigan yerlardan ozuqabop ekinlari uchun yer maydoni ajratiladi;

chorva mollarini sanoat usulida boqishni tashkil etish uchun chorvachilik komplekslari, chorvachilik mahsulotlarini qayta ishlash, omuxta yem ishlab chiqarish hamda xizmat ko‘rsatish infratuzilmalarini tashkil etish maqsadida bino va inshootlar qurish uchun chorva mol bosh sonidan kelib chiqqan holda qishloq xo‘jaligida foydalanilmaydigan yer uchastkasi bo‘lmagan taqdirda, unumdorligi past qishloq xo‘jaligi yer uchastkalari, istisno tariqasida tanlov va auksion o‘tkazmasdan Komissiyaning tavsiyasiga asosan ajratib beriladi;

paxtachilik-to‘qimachilik klasteri yer, suv va boshqa resurslardan samarali hamda oqilona foydalanishga, ozuqabop ekinlar hosildorligini oshirishga, chorvachilik mahsulotlar ishlab chiqarish hajmlarini ko‘paytirish shuningdek, uning chuqur qayta ishlanishini va yuqori qo‘shilgan qiymatga ega mahsulotlar ishlab chiqarishning ko‘paytirilishini ta'minlaydi;

paxtachilik-to‘qimachilik klasterlari chorvachilik komplekslarida ishlab chiqarish (xizmat ko‘rsatish)ning zamonaviy innovatsion texnologiyalardan foydalangan holda, zarur infratuzilma obektlari, chorvachilik mahsulotlari yetishtirish yoki uni shartnoma asosida sotib olish, saqlash, qayta ishlash, tayyor mahsulot ishlab chiqarish, ichki va tashqi bozorga yetkazib berishni ta'minlaydi;

lizing asosida qishloq xo‘jaligi texnikasi xarid qilish, mineral o‘g‘itlar, urug‘lik, yoqilg‘i-moylash materiallari, o‘simliklarni kimyoviy himoya qilish vositalari va boshqa material resurslar yetkazib berish bo‘yicha fermer xo‘jaliklari uchun nazarda tutilgan shartlari hamda tartib paxtachilik-to‘qimachilik klasterlarining chorvachilik tarmog‘i uchun tatbiq etiladi;

paxtachilik-to‘qimachilik klasterlari tomonidan yetishtirilgan paxta xom-ashyosidan hosil bo‘lgan paxta shroti va chigit sheluxasi mahsulotlari klasterlarda tashkil etilgan chorvachilik komplekslaridagi chorva mollari bosh sonidan kelib chiqib, ularni oziqlantirish uchun yo‘naltiriladi.