Kimyolashtirish va o‘simliklarni himoya qilish vositalarini respublikaga olib kirish tartibi soddalashtiriladi. Vazirlar Mahkamasining muhokama uchun e'lon qilingan tegishli qarori loyihasida shu haqda so‘z yuritilgan.

O‘zbekiston Respublikasi Qishloq xo‘jaligi vazirligi, Sog‘liqni saqlash vazirligi, Ekologiya va atrof-muhitni muhofaza qilish davlat qo‘mitasi, “O‘zagrokimyohimoya” AJ, “O‘zkimyosanoat” AJning zararkunanda va kasalliklarga qarshi kurashish uchun xorijiy davlatlarda ishlab chiqarilgan kimyolashtirish va o‘simliklarni himoya qilish vositalarini respublikaga olib kirish tartibini soddalashtirish to‘g‘risidagi taklifi ma'qullanishi mumkin.

Shunday tartib o‘rnatiladiki, unga muvofiq 2020 yil 1 yanvardan:

kimyolashtirish va o‘simliklarni himoya qilish vositalarini respublikaga olib kirish muvofiqlik sertifikati berilgan va O‘zbekiston Respublikasi qishloq xo‘jaligida o‘simlik zararkunandalari, kasalliklariga va begona o‘tlarga qarshi foydalanish uchun ruxsat etilgan kimyoviy va biologik himoya vositalari, defoliantlar hamda o‘simliklarni o‘sishini boshqaruvchi vositalar ro‘yxatiga kiritilgan taqdirda amalga oshiriladi;

kimyolashtirish va o‘simliklarni himoya qilish vositalarini respublikaga olib kirish har qanday jismoniy va yuridik shaxslar tomonidan qonun hujjatlarida belgilangan tartibda amalga oshirilishi mumkin;

kimyolashtirish va o‘simliklarni himoya qilish yuzasidan ro‘yxatga olinmagan kimyolashtirish va o‘simliklarni himoya qilish vositalarini qo‘llagan tarzda shoshilinch choralar ko‘rish talab qilinadigan vaziyatlar yuzaga kelgan hollarda bunday vositalarni bir yilgacha muddatda tajriba tarzida qo‘llash uchun olib kirishga ruxsat etiladi. Bunda parallel ravishda ro‘yxatga olish sinovlari o‘tkaziladi;

zaharlilik darajasi uchinchi va to‘rtinchi klassda bo‘lgan mineral o‘g‘itlar, mikroo‘g‘itlar, biostimulyatorlar hamda bioo‘g‘itlar laboratoriya tahlillari natijalari asosida ro‘yxatga olinadi;

respublikaga olib kiriladigan xalqaro standartlar talablariga javob beradigan, oldin o‘rganilgan va me'yorlangan ta'sir etuvchi modda to‘g‘risidagi to‘liq asosli ma'lumotlar va reglamentlari mavjud bo‘lgan kimyolashtirish va o‘simliklarni himoya qilish vositalari, shuningdek, O‘zbekiston Respublikasida ro‘yxatga olingan preparatlar analoglari bir vegetatsion mavsumda biologik samaradorlik bo‘yicha o‘tkazilgan sinovlar natijalariga ko‘ra ro‘yxatga olinadi;

kimyolashtirish va o‘simliklarni himoya qilish vositasini ro‘yxatga olish uchun toksikologik-gigiyenik, sanitariya-gigiyenik va ekologik xususiyatlarini o‘rganish bo‘yicha buyurtmachi tomonidan asoslangan ma'lumotlar, shu jumladan, xorijiy davlatlarda o‘tkazilgan sinovlar xulosalari taqdim etilgan taqdirda, O‘zbekiston Respublikasi Sog‘liqni saqlash vazirligi huzuridagi Sanitariya-epidemiologiya osoyishtaligi agentligi hamda Ekologiya va atrof muhitni muhofaza qilish davlat qo‘mitasi tomonidan toksikologik-gigiyenik, sanitariya-gigiyenik va ekologik sinovlar o‘tkazilmasdan buyurtmachi taqdim etilgan hujjatlar ekspertizasi xulosalari asosida ro‘yxatga olish uchun tavsiya etiladi;

kimyolashtirish va o‘simliklarni himoya qilish vositalarini respublikaga olib kirish uchun talab etiladigan muvofiqlik sertifikatini rasmiylashtirish va berish muddati barcha zarur bo‘lgan hujjatlarni taqdim etilgan paytdan boshlab ikki ish kunidan oshmasligi lozim.