«Давлат қарзи тўғрисида»ги қонун лойиҳаси ишлаб чиқилади

Иқтисодиёт 15:50 / 03.12.2019 3749

Ўзбекистонда “Давлат қарзи тўғрисида”ги қонун лойиҳаси ишлаб чиқилади. Бу ҳақда 2020 йилда қонун лойиҳаларини ишлаб чиқиш ва Ўзбекистон Республикаси Олий Мажлисининг Қонунчилик палатасига киритиш дастури лойиҳасида айтилган.

Қайд этилишича, қонун лойиҳаси давлат қарзини бошқариш сифатини оширишга йўналтирилган.

Билдирилишича, бугунги шароитда ҳам ташқи, ҳам ички давлат қарзининг сезиларли ўсиши кузатилмоқда. Давлат қарзлари давлатнинг барқарор иқтисодий ўсишига, суверен рейтингига, шунингдек, мамлакатнинг инвестицион жозибадорлигига таъсир қилувчи индикатив параметрларидан биридир.

Қонунни қабул қилиш давлат қарзини бошқариш сифатини сезиларли даражада ошириш имконини бериши айтилади.

Қонун лойиҳасида қуйидагилар назарда тутилади:

давлат қарзига оид асосий тушунчалар ва таърифлар;

қарз ва кредит олиш бўйича йиллик лимитларни белгилаш;

давлат қарзини мониторинг қилиш ва назорат қилиш механизмлари;

ушбу соҳада давлатнинг кафолатини берувчи давлат ҳокимиятининг ваколатли органларини белгилаш ва бошқа масалалар.

Масъул ижрочилар - Молия вазирлиги, Инвестициялар ва ташқи савдо вазирлиги, Иқтисодиёт ва саноат вазирлиги, манфаатдор вазирлик ва идоралар. Вазирлар Маҳкамасига тақдим этиш муддати - 2020 йил 2020 йил 30 ноябрь, Қонунчилик палатасига киритишнинг тахминий муддати - 2020 йил 30 декабрь.

Кўпроқ янгиликлар