Ироқ армияси намойишчиларга ўт очди. Носирияда 13 киши ҳалок бўлди

Жаҳон 22:10 / 28.11.2019 5399

Пайшанба куни мамлакат хавфсизлик кучлари Фрот дарёсидаги иккита кўприкда тўпланган намойишчиларга қарата ўт очди. Бунинг оқибатида камида 70 киши жароҳатланган.

Сўнгги ҳафталарда Ироқнинг турли шаҳарларида норозилик акциялари бўлиб ўтмоқда, намойишлар иштирокчилари ишсизликни йўқотиш, коррупция ва бюрократияга қарши жиддий чоралар кўришни талаб қилишмоқда.

Шу муносабат билан Ироқ армиясида тартибсизликларга қарши курашиш учун «инқироз бўлинмалари» ташкил этилган.

Армия қўмондонлиги мамлакатда тартиб тикланиши учун фавқулодда бошқарма тузилганини маълум қилган.

«Қуролли кучлар бош қўмондони, бош вазир Одил Абдул Маҳди буйруғи билан бир неча ҳарбий қўмондон ушбу бўлинмалар таркибига киритилди. Улар хавфсизлик кучлари ва қуролли кучларни бошқариб губернаторларга ёрдам кўрсатишади», - дейилади армия қўмондонлиги баёнотида.

Бундан аввалроқ намойишчилар гуруҳи Нажаф шаҳрида Эрон консулхонаси биносига ўт қўйиб юборганди.

Бу шаҳардаги намойишчилар Эрон ҳукуматини Ироқ ички ишларига аралашишда айблашмоқда. Улар «Эрон, Ироқдан қўлингни торт!» дея ҳайқиришмоқда.

Хабарларга кўра, Эрон консулхонаси ходимлари намойишчилар келишидан олдин бинони тарк этишга улгуришган. Эрон ушбу ҳужумни кескин қоралади ва Ироқ ҳукумати Эрон дипломатлари ва мулклари ҳимояси учун масъул эканини билдирди.

Қайд этиш керакки, бу Ироқда ноябрь ойида иккинчи бор Эрон консулхонасига ҳужум қилиниши бўлди; уч ҳафта муқаддам шиалар учун муқаддас ҳисобланган Карбало шаҳридаги Эрон ваколатхонаси вайрон этилган эди.

Намойишларнинг сабаби нимада?

Бир йил муқаддам Ироқ бош вазири бўлган шиалар ҳаракати фахрийси Абдул Маҳди ислоҳотлар ўтказишни ваъда қилганди, аммо амалда бу ваъдалар бажарилмади.

1 октябрь куни Бағдод кўчаларига ишсизлик ва коррупцияни йўқотишни талаб қилган минглаб ёшлар чиқишди.

Хавфсизлик хизмати кучлари намойишчиларга қарши қурол ишлатди, ўнлаб намойишчилар ҳалок бўлди, шундан сўнг норозилик акциялари мамлакатнинг қолган қисмларига ҳам ёйилди.

Намойишларнинг биринчи тўлқини 6 кун давом этди ва жами 149 киши ҳалок бўлди. Бош вазир Абдул Маҳди ўз ҳукуматида ўзгаришлар ўтказишни, юқори маош олувчи амалдорларнинг ойликларини қисқартиришни ва ёшлар орасидаги ишсизлик даражасини камайтиришни ваъда қилди.

Аммо октябрь ойи охирида намойишчилар ўз талаблари бажарилмаслигига амин бўлгач яна кўчаларга қайтиб чиқишди. Хавфсизлик кучлари намойишчиларни тарқатиш учун кўздан ёш оқизувчи газлар ва водомётлар қўллади.

Ироқ президенти Барҳам Солиҳ агар сиёсий партиялар муносиб номзод бўйича келишувга эриша олишса, Абдул Маҳди истеъфога чиқишини маълум қилган.

Кўпроқ янгиликлар