Ўзбекистоннинг учта вилоятида шамолдан энергия олувчи қурилмалар ўрнатилади

Ўзбекистон 00:54 / 20.11.2019 16801

Ўзбекистон Инвестициялар ва ташқи савдо вазирлиги «China International Import Expo» 2-импорт маҳсулотлар халқаро кўргазмасида Хитойнинг «Liaoning Leader Investment Holding Group» холдинг корпорацияси билан қайта тикланувчи яшил энергетика соҳасида лойиҳаларни амалга ошириш бўйича келишувга эришди. Бу ҳақда «Дунё» АА хабар бермоқда.

Бухоро, Самарқанд ва Навоий вилоятларида амалга ошириладиган лойиҳаларнинг биринчи босқичида умумий қуввати 600 МВт бўлган шамол энергетика қурилмалари ўрнатилади. Лойиҳалар 720 миллион долларлик тўғридан-тўғри инвестициялар ҳисобига молиялаштирилиши кўзда тутилмоқда.

Хитой компанияси синов лойиҳаси сифатида Бухоро вилоятининг Ғиждувон туманида шамол ўлчовларини аниқлаш учун учта анемометрик минора ўрнатди. Аниқлаш натижаларига кўра ўрнатиладиган шамол энергетика қурилмалари жойлашуви ва техник хусусиятлари белгилаб олинади.

«Liaoning Leader Investment Holding Group» компанияси билан Ўзбекистондаги энергетика тизимлари ва электр узатиш линияларига улаш воситаларини модернизация қилишда инновацион технологиялардан фойдаланиш бўйича келишувга эришилди.

Кўпроқ янгиликлар