«Адолат» партияси журналистларга таҳдид қилган Жаҳонгир Ортиқхўжаевга қонуний чора кўрилишини сўради

Ўзбекистон 08:20 / 17.11.2019 62082

«Адолат» социал-демократик партияси Тошкент шаҳри ҳокими Жаҳонгир Ортиқхўжаевнинг журналистларни ҳақоратлаган ва таҳдид қилган аудиоси юзасидан муносабат билдирди.

«Адолат» партияси ҳокимнинг бу сўзлари инсон ҳуқуқлари ва унинг шаъни, қадр-қиммати, дахлсиз ҳуқуқларининг бузилиши деб ҳисоблашини маълум қилган. Баёнотда ОАВни рағбатлантириш давлат сиёсати даражасига кўтарилганда айрим раҳбарлар, хусусан, ижро ҳокимияти мутасаддилари ушбу касб вакилларига нисбатан бундай муносабатда бўлиши кишини жиддий ўйлантириши айтиб ўтилган.

«Нега баъзи мансабдорлар ўз фаолиятида ОАВга суянишнинг ўрнига беписандлик билан ёндашмоқда? Нима сабабдан аввалги баъзи мутасаддиларнинг «хурмача» қилиқларидан пойтахт ҳокими Жаҳонгир Ортиқхўжаев тўғри сабоқ чиқармади? Ҳокимнинг оғзидан янграган сўзлар нафақат журналист ёки блогер, балки эшитган ҳар бир қулоқ учун оғир ботади. Инсон ҳуқуқлари устувор жамиятда бу ҳолатни қандай ҳазм қилиш мумкин?

Ушбу ҳолатга Президент Администрацияси ҳузуридаги Ахборот ва оммавий коммуникациялар агентлиги ҳамда Ўзбекистон Журналистлари ижодий уюшмаси томонидан ҳимоявий чора кутиб қоламиз.

Шунингдек, журналист ва блогерларни мамлакатимизда олиб борилаётган ислоҳотлар ижросини таъминланишидаги ҳиссасини ҳамда жамиятимизда адолатни ўрнатишдаги фаоллигини эътироф этган ҳолда, ҳуқуқни муҳофаза қилувчи органлар томонидан Тошкент шаҳар ҳокими Жаҳонгир Ортиқхўжаевга нисбатан қонунда белгиланган тартибда қатъий чора кўрилишини сўраймиз», – дейилади баёнотда.

Кўпроқ янгиликлар