Зафар Ҳошимов: «Ички бозорда IPO ўтказиш босқичига ҳам етиб келишимизга ишонаман»

Иқтисодиёт 18:54 / 16.11.2019 9817

15 ноябрь куни Тошкентда «Ўзбекистон иқтисодиётининг ривожида капитал бозорининг ўрни» мавзусида халқаро конференция бўлиб ўтди. Унда инвестиция компаниялари ва молиявий институтлар экспертлари, Ўзбекистон компаниялари ва давлат органлари вакиллари иштирок этди.

Конференцияда «Korzinka.uz» асосчиси ва раҳбари Зафар Ҳошимов ҳам спикер сифатида қатнашди. Анжуман давомида унга: «Агар бирор йирик лойиҳангиз ёки компанияни кенгайтириш режангиз бўлса, маҳаллий бозорда IPO (акциядорлик жамияти акцияларининг илк марта оммавий сотилиши) ўтказармидингиз?» дея савол билан мурожаат қилинди.

Kun.uz мухбирининг хабар беришича, тадбиркор бу саволга жавобан Ўзбекистон иқтисодий ривожланишнинг бу босқичига ҳам етиб келишига ишонишини таъкидлаган.

«Ўтган ўн йилликларда бозор ривожланиши суръатлари ҳамда ўшанда мавжуд бўлган чекланишлар бизга катта тезликда ўсишга эришиш имконини бермаётганди. Секин ўсиш учун эса  бизнеснинг ўзи ҳосил қилаётган пул оқими билан кифояланаётган эдик.

Лекин ҳозир бозоримиз очиляпти. Эшитган бўлсангиз керак, соҳамизга катта халқаро ўйинчилар назар солишяпти. Биз учун тезкор ўсиш ҳозирда муҳим аҳамият касб этяпти. Шу сабабли биз инвесторлар билан жадал музокаралар олиб боряпмиз.

Маҳаллий бозорда IPO ўтказишга келадиган бўлсак, бу босқичга ҳам қачондир етиб келишимизга ишонаман. Исталган мамлакатга қарайдиган бўлсангиз, иқтисодий ўсиш бозор муносабатлари ва иқтисодий инфраструктура ривожланиши билан боғлиқ ҳолда рўй берганини кўришингиз мумкин. Иқтисодий ўсишни тадбиркорлик руҳияти ва тадбиркорликка нисбатан мавжуд ижобий муҳит шакллантиради. Жадал ўсиш ортида эса, булардан ташқари, доим унинг ўзининг «Wall Street»и бўлади. Ҳозир шу ерда, эҳтимол, ўзбек «Wall Street»и инаугурациясининг гувоҳи булиб тургандирмиз», – деди Зафар Ҳошимов.

Кўпроқ янгиликлар