Ўзбекистон Адвокатлар палатаси раисининг биринчи ўринбосари Шуҳрат Содиқов сешанба куни матбуот анжуманида адвокатлар етишмаслиги муаммоси ҳақида тўхталиб ўтди.

«Биз соҳага ёшларни жалб қила олмаяпмиз. Талабалар билан яқиндан ишлаяпмиз, лекин уларни касбимизга олиб киришда икки йиллик тажриба керак. Бу – икки йилни йўқотишдир.

Ҳозирда 4 минг адвокат орасида 30 ёшгача бўлганлари атиги 70 нафарни ташкил этади. Бу ҳам соҳадаги ёшлар бўйича ҳолатни кўрсатиб турибди. Талабгорлар ё чет элга ўқиш ёки ишга кетиб қолади, ё бошқа иш топиб кетади.

Адвокатлар палатаси ҳузурида талабалар учун клуб очганмиз. Куни кеча унда сабоқ олаётган Тошкент давлат юридик университетининг 15 нафар талабаси адвокат бўламан деяпти. Лекин эртага: «2 йил сенга иш бера олмайман», деганимиздан кейин уни бошқа иш берувчи олиб кетади. Шу тариқа ёш кадрларни ҳам йўқотяпмиз. Янги қонунда бу тўсиқни олиб ташлаймиз ва умид қиламизки, адвокатлар сони ортади», – дея Содиқовнинг сўзларини келтирмоқда Kun.uz мухбири.

Маълумот учун, Ўзбекистонда 8 250 нафар фуқарога 1 нафар адвокат тўғри келади. Бу кўрсаткич АҚШда 256 нафар, Италияда 260 нафар, Германияда 500 нафар, Озарбайжонда 667 нафар, Голландияда 900 нафар, Францияда 1 403 нафар, Қозоғистонда 4 000 нафар фуқарога тўғри келади.