O‘zbekiston Advokatlar palatasi raisining birinchi o‘rinbosari Shuhrat Sodiqov seshanba kuni matbuot anjumanida advokatlar yetishmasligi muammosi haqida to‘xtalib o‘tdi.

«Biz sohaga yoshlarni jalb qila olmayapmiz. Talabalar bilan yaqindan ishlayapmiz, lekin ularni kasbimizga olib kirishda ikki yillik tajriba kerak. Bu – ikki yilni yo‘qotishdir.

Hozirda 4 ming advokat orasida 30 yoshgacha bo‘lganlari atigi 70 nafarni tashkil etadi. Bu ham sohadagi yoshlar bo‘yicha holatni ko‘rsatib turibdi. Talabgorlar yo chet elga o‘qish yoki ishga ketib qoladi, yo boshqa ish topib ketadi.

Advokatlar palatasi huzurida talabalar uchun klub ochganmiz. Kuni kecha unda saboq olayotgan Toshkent davlat yuridik universitetining 15 nafar talabasi advokat bo‘laman deyapti. Lekin ertaga: «2 yil senga ish bera olmayman», deganimizdan keyin uni boshqa ish beruvchi olib ketadi. Shu tariqa yosh kadrlarni ham yo‘qotyapmiz. Yangi qonunda bu to‘siqni olib tashlaymiz va umid qilamizki, advokatlar soni ortadi», – deya Sodiqovning so‘zlarini keltirmoqda Kun.uz muxbiri.

Ma'lumot uchun, O‘zbekistonda 8 250 nafar fuqaroga 1 nafar advokat to‘g‘ri keladi. Bu ko‘rsatkich AQShda 256 nafar, Italiyada 260 nafar, Germaniyada 500 nafar, Ozarbayjonda 667 nafar, Gollandiyada 900 nafar, Fransiyada 1 403 nafar, Qozog‘istonda 4 000 nafar fuqaroga to‘g‘ri keladi.