Электр энергиясини ишлаб чиқариш табиий монополия соҳасидан чиқариб юборилади – Монополияга қарши курашиш қўмитаси

Ўзбекистон 14:50 / 08.11.2019 3860

8 ноябрь куни Ахборот ва оммавий коммуникациялар агентлигида «Мамлакатда рақобатни ривожлантириш бўйича кейинги йилларга мўлжалланган стратегик йўналишлар» мавзусида матбуот анжумани бўлиб ўтди. 

Тадбирда монополияга қарши курашиш, рақобат муҳитини яхшилаш ва ривожлантириш, истиқболли режалар ишлаб чиқиш ва соҳага оид долзарб масалалар муҳокама қилинди.

Матбуот анжуманида берилган маълумотларга кўра, тадбиркорлик секторининг босқичма-босқич ривожланиши кузатилмоқда. Фақатгина охирги уч йил мобайнида амалда фаолият кўрсатаётган тадбиркорлик субъектларининг сони деярли 25 фоиз кўпайган, иқтисодиётнинг барча тармоқлари томонидан яратилган ялпи қўшимча қиймат ЯИМ умумий ҳажмининг 88,8 фоизини ташкил этган ва 5,1 фоизга ўсган.

Ҳозирда қўмита томонидан янги қонун устида иш олиб борилмоқда. Унга «Рақобатни ҳимоя қилиш тўғрисида»ги қонун номини бериш таклифи берилган. 

Матбуот анжуманида Ўзбекистон Республикаси Монополияга қарши курашиш қўмитаси раиси ўринбосарлари томонидан журналистларнинг саволларига жавоблар берилди.

Тадбир давомида Монополияга қарши курашиш қўмитаси раисининг биринчи ўринбосари Бобир Каримов хусусийлаштириш жараёни сабаб табиий монополия субъектлари сони яна қанчага камайиши ҳақидаги саволга жавоб берди.

«Янги қонунчиликда табиий монополия тушунчасини умуман ўзгартиряпмиз. Агар қонунимиз парламент томонидан қабул қилинса, темир йўлда юк ва йўловчилар ташиш хизматлари [табиий монополия субъектларидан] умуман чиқиб кетади. Темир йўллар тизимида кўп корхоналар бор. Ёки айтайлик электр энергияси бўйича. Ҳозирги кунда электр энергиясини ишлаб чиқариш, уни узатиш ва сотиш мана шу учта соҳа. Электр энергиясини ишлаб чиқаришни табиий монополия соҳасидан умуман чиқариб юбормоқчимиз. Чунки иқтисодиётимиз ривожланяпти, инновациялар кириб келяпти. Бу соҳани табиий монополия соҳасидан чиқариб юборадиган бўлсак, эртага инвесторлар киради ва электр энергиясини ишлаб чиқарадиган ва уни сотадиган корхоналар кўпаяди. Улар табиий монополия ҳисобланмайди. Табиий монополияда фақат электр энергиясини узатиш корхоналари қолади. Умумий олганда табиий монополия [субъектлари] жуда катта рақамга камаяди», - дея келтирмоқда Каримовнинг сўзларини Kun.uz мухбири. 

Кўпроқ янгиликлар