O‘smirlarga tungi vaqt, ish kunlari va bayramlarda onlayn-o‘yinlar o‘ynash cheklanadi. 18 yoshgacha o‘smirlarga ish kunlari 90 daqiqadan ko‘p onlayn-o‘yinlar o‘ynash taqiqlanadi, bayram va dam olish kunlari esa 3 soatgacha o‘ynashga ruxsat beriladi.

Bundan tashqari, soat 22:00dan 8:00gacha o‘yinlar o‘ynash taqiqlanadi. Shuningdek, o‘smirlar o‘yinlar ichidagi buyumlarni sotib olishiga cheklov kiritiladi. Unga ko‘ra, 8 yoshdan 16 yoshgacha bolalarga o‘yinlardagi hisobraqamlarini oyiga 200 yuandan (29 dollar), 16 yoshdan 18 yoshgacha o‘smirlarga esa 400 yuandan (57 dollar) ko‘proqqa to‘ldirish taqiqlanadi.   

Bu choralar Xitoydagi barcha onlayn-platformalarda joriy qilinadi.

Bunday qat'iy choralar kiritilishi o‘smirlarning onlayn-o‘yinlarga ruju qo‘yishi oqibatida o‘qishda o‘zlashtirishi pastligi va ularda uzoqni yaxshi ko‘rolmaslik rivojlanishi bilan bog‘langan. Mansabdor shaxslar yangi cheklovlar “balog‘atga yetmaganlarning ruhiy va jismoniy salomatligini himoyalashga” yordam berishiga umid qilishmoqda. Biroq, geymerlar va ularning ota-onalari yangi qoidalarga shubha bilan qarashmoqda. Ularning fikricha, bolalar o‘yin ishlab chiqaruvchilarini ota-onalarining ma'lumotlaridan foydalanib alday olishlari mumkin.

Texnologik kompaniyalardan birining egasi Yang Bingbenning fikricha, ko‘pchilik o‘smirlar ushbu cheklovlarni chetlab o‘tish yo‘llarini topa olishadi yoki internetga ulanishni talab qilmaydigan bir foydalanuvchili kompyuter o‘yinlarini o‘ynashga o‘tib ketishadi. Uning fikricha, bolalarni o‘yinlardan chalg‘itish uchun ko‘proq sport maydonchalari va stadionlar qurish lozim.

Avvalroq Tailandda 17 yoshli o‘smir bir necha kun davomida kompyuter o‘yinlarini tinimsiz o‘ynashi oqibatida insultga uchrab, vafot etgani ma'lum qilingandi.