Ўзбекистон Хитойга ерёнғоқ экспорт қилади

Иқтисодиёт 20:00 / 07.11.2019 3485

Ўзбекистон Республикаси Бош вазири ўринбосари Элёр Ғаниевнинг 5 ноябрь куни Хитой Халқ Республикасининг Шанхай шаҳрига амалга оширган ташрифи давомида Ўзбекистондан Хитойга ерёнғоқ экспорт қилиш бўйича фитосанитария талаблари ва назорати тўғрисидаги баённома имзоланди.

Ушбу баённома асосида Ўзбекистоннинг экспорт корхоналари ерёнғоқни Хитойнинг бир қатор талабларини бажарган ҳолда экспортни амалга ошириши мумкин.

Асосий талаблар бу, Хитойга Ўзбекистондан экспорт қилинадиган ерёнғоқ Хитойнинг барча фитосанитария ва озиқ-овқат хавфсизлигига тегишли қонун ҳужжатлари, қарорлари ва миллий озиқ-овқат хавфсизлик стандартларига мувофиқ бўлиши, Хитой томони учун хавфли бўлган карантин остидаги зараркунандалардан холи бўлиши лозим.

Ўзбекистондан Хитойга экспорт қилинадиган ерёнғоқни етиштириш, қайта ишлаш ва сақлашдан тортиб, бутун жараён патоген микроорганизмлар, биотоксинлар, заҳарли ва зарарли моддалар билан ифлосланишининг олдини олиш учун иккала томоннинг тегишли назорат ва фитосанитария талабларига жавоб бериши керак.

Хитойга экспорт қилинадиган Ўзбекистон ерёнғоғи Хитойнинг кириш портларига етказилганидан сўнг, Хитой томони қонунига мувофиқ текшириш ва карантин назоратини амалга оширади.

Агар ерёнғоқлар рўйхатга олинмаган ишлаб чиқариш, қайта ишлаш ва сақлаш корхоналаридан келгани аниқланса, уларнинг Хитойга киришига йўл қўйилмайди.

Ерёнғоқни экспорт қилувчи корхоналарда ишлаб чиқариш, қайта ишлаш ва сақлашда зарарли организмлар мониторинги ва назорати Ўзбекистон томони ваколат берган ходимлар назорати остида ўтказилиши лозим.

Ўзбекистон томони рўйхатдан ўтказиш учун асосий талабларга жавоб берадиган ишлаб чиқариш, қайта ишлаш ва сақлаш корхоналарини рўйхатдан ўтказади ва Хитой томонига тавсия қилади, улар Хитой томонидан тасдиқланиб рўйхатдан ўтказилади. Рўйхатга олиш тўғрисидаги маълумотлар корхонанинг номи, рўйхатдан ўтказиш рақами, рўйхатдан ўтган манзили ва корхона турини ўз ичига олиши керак.

Ерёнғоқнинг Хитойга экспортини амалга ошириш истагини билдирган ишлаб чиқариш корхоналари «Ўзбошдавкарантин» инспекциясига мурожаат қилишлари мумкин.

Тел: +998712552851, +998712557323;

Электрон почта: glavkaruz@mail.ru; www.karantin.uz

Элчихонадаги масъул бўлим почтаси: uzchinaexport@mfa.uz

Шу билан бирга, ҳозирги кунда Хитойга қўшимча равишда узум, лимон, олхўри, шафтоли, ўрик, ловия ва бир қатор қуритилган мева-сабзавотлар экспорт қилинишига рухсат олиш бўйича фаол иш олиб борилмоқда.

Кўпроқ янгиликлар