Гибрид почтадан электрон тижоратгача: «Ўзбекистон почтаси» жонланадими?

Ўзбекистон 14:50 / 07.11.2019 1872

«Ўзбекистон почтаси» фаолиятини жонлантириш, уни қарз ботқоғидан олиб чиқиб, даромадли соҳага айлантириш АКТ вазирлиги олдида турган муҳим вазифалардан биридир. Бу ҳақда 6 ноябрь куни Олий Мажлис Қонунчилик палатасида бўлиб ўтган «Ҳукумат соати»да вазир Шуҳрат Содиқов айтиб ўтди.

Шуҳрат Содиқов / АКТ вазирлиги ахборот хизмати

Вазир «Ўзбекистон почтаси» АЖ 2018 йилни 27,8 млрд сўм зарар билан якунлаганини қайд этиб ўтган. Россиялик Евгений Биргер раҳбарлиги вақтида жамият томонидан янги хизмат турларини жорий этишга етарлича эътибор берилмагани натижасида даромадлар ҳажми 47 фоизга камайиб кетган. Пенсия ва ижтимоий нафақаларни етказиб бериш хизмати тўлиқ Халқ банкига ўтказилгани ҳам даромадлар харажатларга нисбатан камайиб кетишига олиб келган.

Вазиятни ўнглаш ва жамият даромадларини ошириш мақсадида 2019 йилнинг 9 ойида 10та янги хизмат жорий этилган. Жумладан, қатор интернет дўконларидан харид қилинган товарлар почта орқали етказиб берилмоқда, Россия, Қозоғистон ва қатор Европа мамлакатларига почта жўнатмаларини етказиб берилмоқда, «Гибрид почта» хизмати йўлга қўйилди.

«Гибрид почта» – почта алоқаси ҳамда телекоммуникация тармоқлари ёрдамида хат-хабарларни олувчиларга етказиш хизмати. Бундан электрон кўринишида тайёрланган маълумотлар (хат, хабарнома, қарор, билидиришнома ва бошқалар) бошқа идораларга етказиб берилади. Маълумотлар «Гибрид почта» тизими базасига келиб тушгач, улар почта корхонаси томонидан қоғоз кўринишида конвертланади ва манзиллар буйича адресатларга етказиб бериш учун юборилади. Ҳар бир жўнатма тўғрисида штрихкод орқали махсус дастурдан ёки www.pochta.uz сайтидан маълумот олиш мумкин. Бугунги кунда мазкур тизим орқали ИИВ, Йўл ҳаракат хавфсизлиги бошқармасининг қарорлари, Прокуратура ҳузуридаги Тошкент шаҳар Мажбурий ижро бюросининг хабарномалари манзилларга етказиб берилмоқда.

«Қўшимча равишда 228та почта алоқаси объектларида «Алском», «Кафолат», «Ўзбекинвест», «Ўзагросуғурта» ва «Альфа-инвест» суғурта компанияларининг полисларини сотуви йўлга қўйилди, ушбу хизматларни кўрсатадиган почта алоқаси объектлари сони 1174тага етказилди. 131та почта алоқаси объектларида Тезкор почтани қабул қилиш-жўнатиш ишлари ташкил этилиб, ушбу хизмат йўлга қўйилган объектлар сони 325тага етказилди. 111та почта алоқаси объектларида Курьерлик хизмати йўлга қўйилиб, жами объектлар сони 268тага етказилди», дея Шуҳрат Содиқовнинг сўзларини келтирмоқда Kun.uz мухбири.

«Ҳукумат соати»да электрон тижорат орқали сотиб олинган товарлар жойланган почта жўнатмаларини етказиб бериш хизмати ривожлантирилиб, умумий оғирлиги 102,4 тонналик 1,5 миллионта буюртма қабул қилингани ва 1,0 млн доллардан зиёд даромад олингани ҳам маълум қилинди. Бунинг натижасида «Ўзбекистон почтаси» АЖ 2019 йилнинг 9 ойида 109,6 млрд сўм даромад олган ва йилни зарарсиз якунлаши кутилмоқда.

АКТ вазири республикада почта хизматини ривожлантириш режалари билан ҳам ўртоқлашди. Унга кўра, электрон тижорат орқали сотиб олинадиган товарларни почта тармоғи орқали етказиб бериш кенгайтирилади, трансчегаравий Интернет-савдони ривожлантириш орқали Ўзбекистон почтаси жамияти даромадларини кўпайтириш чоралари кўрилади. Ҳозирги кунда кўрсатилаётган универсал почта хизматларини табиий монополия шароитида кўрсатиладиган хизматлар рўйхатидан чиқариш бўйича таклифлар киритилади (ҳозирда республика бўйича Жамиятдан ташқари 200га яқин субъектлар почта алоқаси хизматларини кўрсатади).

Маълумот учун, бугунги кунда «Ўзбекистон почтаси» 4та ихтисослаштирилган ва 14та ҳудудий филиал, 136та почта алоқаси боғламаси, 1812та стационар ва 5та кўчма алоқа бўлимига эга. Тизимда 7430 нафар ишчи-ходим меҳнат қилмоқда.

Кўпроқ янгиликлар