Aniqlanishicha, halok bo‘lganlarning barchasi vetnamliklar bo‘lgan.

Shuningdek, Vetnam hukumati jonsiz holda topilgan muhojirlarning barchasi vetnamlik bo‘lganini tasdiqlagan. Ma'lum qilinishicha, muhojirlar Vetnamning Xayfon shahri, Ngean, Xatin, Kuang Bin va Txma Txiyen Xue provinsiyalaridan bo‘lganlar.

Hozirda Britaniya va Vetnam ushbu voqeani birgalikda tergov qilmoqda.

Dastlab halok bo‘lganlar Xitoy fuqarolari bo‘lgani, keyinroq ular orasida vetnamliklar borligi aytilgan.

Vetnam bosh vaziri Nguyen Suan Fuk odamlarning noqonuniy tashilishi yuzasidan tergov o‘tkazishni topshirgan. Bundan tashqari, Vetnam huquq-tartibot idoralari muhojirlarning o‘limiga aloqador bo‘lgan 11 nafar gumonlanuvchini qo‘lga olgan. O‘z navbatida, Britaniyada ushbu voqea yuzasidan ikki shimoliy irlandiyalikka, jumladan yuk mashinasi haydovchisiga qasddan sodir etilmagan qotillik ayblovi qo‘yilgan.