АҚШ Жанубий Кореядан қўшма мудофаа учун харажатларни беш бараварга оширишни талаб қилмоқда – ОАВ

Жаҳон 14:42 / 07.11.2019 4709

YTN телеканалининг маълумот беришича, Вашингтон Жанубий Корея тўлайдиган бадалнинг бир қисми Корея ярим оролидан ташқаридаги АҚШ қуролли кучларини сақлаб туриш учун тақсимланишини ҳам талаб қилмоқда.

Вашингтон Сеулдан Корея ярим оролидаги АҚШ аскарларини сақлаб туриш учун харажатларни беш бараварга оширишни талаб қилди. YTN телеканалининг билдиришича, гап 4,7 млрд доллар тўғрисида бормоқда.

АҚШнинг мазкур позицияси ҳақида Корея Республикасининг бирлашиши бўйича парламент қўмитаси раҳбари Юн Сан Хён маълум қилган.

Унинг сўзларига кўра, 6 ноябрь куни Қўшма Штатларнинг мудофаа харажатларини тақсимлаш масалалари бўйича воситачиси Жеймс Дехарт Юн Сан Хён билан музокара чоғида ана шу фикрни билдирган. Сўралган 5 трлн вон ($4,7 млрд) миқдоридаги маблағ Корея ярим оролидаги Америка қўшинларининг жанговар қобилиятини оширишга ва уларнинг эҳтиёжлари учун сарфланади.

Шу билан бирга, YTN телеканалининг маълумот беришича, Вашингтон Жанубий Корея тўлайдиган бадалнинг бир қисми Корея ярим оролидан ташқаридаги АҚШ қуролли кучларини сақлаб туриш учун тақсимланишини ҳам талаб қилмоқда.

Юн Сан Хён бу талаб қўшма мудофаа учун харажатларни тақсимлаш тўғрисидаги келишувга мувофиқ келмаслигини, шу боис парламент депутатлари розилигини олиш кераклигини айтган.

Қўшма Штатлар қўшинлари 1950 йилдан буён Жанубий Кореяда бўлиб, уларнинг бу мамлакатда бўлиш тартиби қўшма мудофаа тўғрисидаги келишув асосида тартибга солинади.

Кўпроқ янгиликлар