Politsiya tun yarmida voqea joyiga kelgan. Xabar qilinishicha, fura haydovchisi - 25 yoshli irlandiyalik qotillikda gumonlanib qo‘lga olingan.

Mashina yukxonasida bo‘lganlarning 38 nafari katta yoshlilar va bir nafari o‘smir yoshida bo‘lgan. Mahalliy politsiya departamenti zobiti Endryu Mariner halok bo‘lganlarning shaxsini aniqlash uchun ko‘p vaqt ketishi mumkinligini aytgan.

Ma'lum bo‘lishicha, fura Bolgariyadan kelgan va yakshanba kuni Buyuk Britaniya hududiga kirgan.

«Biz qotillikka aloqadorlikda gumon qilib haydovchini hibsga oldik, tekshiruv ishlari davom etmoqda», degan Mariner.

Esseks grafligi politsiya departamenti boshlig‘i o‘rinbosari Pipp Millsning so‘zlariga ko‘ra, soat tungi 1:40 atrofida ushbu fura oldiga tez yordam mashinasi kelgan. Hozircha tibbiyot xodimlarini voqea joyiga kim chaqirgani ma'lum emas.

«Bizningcha, fura Bolgariyadan Holihed porti orqali (Angliya shimoli-g‘arbidagi port) 19 oktabr kuni Birlashgan Qirollik hududiga kelgan. Qutqaruvchilar voqea joyiga yetib borishdi, ammo ularning barchasi halok bo‘lgandi. Ulardan biri o‘smir yoshda bo‘lgan», - deydi Mills.

Fura topilgan hudud politsiyachilar tomonidan o‘rab olingan.

Ehtimoliy talqin
«Odam savdosi - qabih va xavfli biznes», deya yozgan Esseksdagi Tarrok hududidan parlament a'zosi bo‘lgan Jyek Doyl-Prays, u qotillar tez orada topilishi va sud qarshisiga keltirilishiga umid qilishini bildirgan.

Politsiya hozircha voqeaning boshqa tafsilotlarini keltirmadi.

Buyuk Britaniya Ichki ishlar vaziri Priti Patel fojiali hodisadan shokka tushgani haqida gapirgan.

Eslatib o‘tamiz, 2015 yilda Avstriyada ichida 71 kishining jasadi bo‘lgan avtofurgon topilgandi. Yukxonadagilarning barchasi migrantlar bo‘lgan, ular furgonda havo yetishmay bo‘g‘ilib jon berishgandi. Keyinroq Vengriyada Bolgariyaning uch fuqarosi va bir afg‘onistonlik qo‘lga olingan, ular odam savdosi bilan shug‘ullangan bolgar-vengr jinoiy guruhi vakillari ekani aniqlangandi.