Полиция тун ярмида воқеа жойига келган. Хабар қилинишича, фура ҳайдовчиси - 25 ёшли ирландиялик қотилликда гумонланиб қўлга олинган.

Машина юкхонасида бўлганларнинг 38 нафари катта ёшлилар ва бир нафари ўсмир ёшида бўлган. Маҳаллий полиция департаменти зобити Эндрю Маринер ҳалок бўлганларнинг шахсини аниқлаш учун кўп вақт кетиши мумкинлигини айтган.

Маълум бўлишича, фура Болгариядан келган ва якшанба куни Буюк Британия ҳудудига кирган.

«Биз қотилликка алоқадорликда гумон қилиб ҳайдовчини ҳибсга олдик, текширув ишлари давом этмоқда», деган Маринер.

Эссекс графлиги полиция департаменти бошлиғи ўринбосари Пипп Миллснинг сўзларига кўра, соат тунги 1:40 атрофида ушбу фура олдига тез ёрдам машинаси келган. Ҳозирча тиббиёт ходимларини воқеа жойига ким чақиргани маълум эмас.

«Бизнингча, фура Болгариядан Ҳолиҳед порти орқали (Англия шимоли-ғарбидаги порт) 19 октябрь куни Бирлашган Қироллик ҳудудига келган. Қутқарувчилар воқеа жойига етиб боришди, аммо уларнинг барчаси ҳалок бўлганди. Улардан бири ўсмир ёшда бўлган», - дейди Миллс.

Фура топилган ҳудуд полициячилар томонидан ўраб олинган.

Эҳтимолий талқин
«Одам савдоси - қабиҳ ва хавфли бизнес», дея ёзган Эссексдаги Таррок ҳудудидан парламент аъзоси бўлган Жек Дойл-Прайс, у қотиллар тез орада топилиши ва суд қаршисига келтирилишига умид қилишини билдирган.

Полиция ҳозирча воқеанинг бошқа тафсилотларини келтирмади.

Буюк Британия Ички ишлар вазири Прити Патель фожиали ҳодисадан шокка тушгани ҳақида гапирган.

Эслатиб ўтамиз, 2015 йилда Австрияда ичида 71 кишининг жасади бўлган автофургон топилганди. Юкхонадагиларнинг барчаси мигрантлар бўлган, улар фургонда ҳаво етишмай бўғилиб жон беришганди. Кейинроқ Венгрияда Болгариянинг уч фуқароси ва бир афғонистонлик қўлга олинган, улар одам савдоси билан шуғулланган болгар-венгр жиноий гуруҳи вакиллари экани аниқланганди.