Андижонда «кўпчилик қизиқадиган» шифохона машмашаси қачон ҳал этилади?

Жамият 15:27 / 21.10.2019 17272

Kun.uz’га Андижон вилоят травматология ва ортопедия шифохонасининг бир гуруҳ шифокорлари мурожаат қилишди. Мурожаатда улар фаолият юритаётган шифохона бир муддат аввал вилоят соғлиқни сақлаш бошқармаси балансида «ноль» қийматда тадбиркорга бериб юборилгани, орада ноқонуний равишда бино ижара шартномаси тузилгани ва бошқа муаммолар келтирилганди.

Журналистик суриштирувни травматология ва ортопедия шифохонасининг бош шифокори ўринбосари Ҳамидулло Зокировдан изоҳ олиш билан бошладик.

Унинг сўзларига кўра, 2018 йилнинг январида вилоят ҳокими Шуҳрат Абдураҳмонов раҳбарлигида тадбиркорлар билан мажлис ўтказилган. Мажлисда юз фоиз ўзи топган маблағ ҳисобидан кун кечираётган шифохоналар Вазирлар Маҳкамасининг тегишли қарори асосида хусусийлаштирилаётгани маълум қилинган. Вилоят ҳокими масъулларга шундай шифохоналардан бири бўлган вилоят травматология ва ортопедия шифохонасини тадбиркор Ҳадятилло Ниёзовга бериш бўйича таклиф тайёрлашни вазифа қилиб юклаган. Мажлисда Ҳ.Ниёзов сўзга чиқиб, 3,5 миллиард сўм маблағ эвазига ҳудудда янги 3 қаватли шифохона биноси қуриш орқали 300та янги ишчи ўрни яратишга ваъда берган. Бироқ ваъдалар тўлиқ бажарилмаган.

«2018 йилнинг февраль ойида бузиш ишларига рухсати бўлмай туриб, бир қаватли биномизни бузиб ташлади. Буни суратлар, кейинчалик техник кўрик учун ўтказилган сумма ва бузиб бўлингач олинган бузишга рухсат берувчи ҳужжатлар санаси тасдиқлайди.

Кадастр ҳужжатларида бино эгаси бизнинг шифохона бўлишига қарамай, бинонинг ертўла қисмини ижарага бериш бўйича «Андижон вилоят давлат мулкини ижарага бериш маркази» давлат унитар корхонаси, Андижон вилояти Соғлиқни сақлаш бошқармаси ва «Кўп тармоқли травматология ва ортопедия шифохонаси» МЧЖ ўртасида уч томонлама ижара шартномаси тузилибди. Шартнома ноқонуний бўлгани боис кейинчалик бекор қилинди.

Шу билан бирга, бинонинг талабга жавоб бермайдиган ва фойдаланиш мумкин бўлмаган пастки қисмидан фойда топиш мақсадида уни таъмирлаб фойдаланишни бошлаган. Қурилиш, бузиш ва таъмирлаш ишларини назорат қиладиган ташкилотларга мурожаат қилганимизда тадбиркор улардан тегишли рухсатларни олмасдан бузиш ва таъмирлаш ишларини бошлагани маълум бўлди. Бино пойдеворидан тешиклар очилган. Кучлироқ зилзила бўлса, 3 қаватли бино қулаб тушиши ҳеч гап эмас. Зарарини ким тўлайди?», дея маъмурият номидан эътирозларини билдирди бош шифокор ўринбосари.

Шифокор ижара шартномаси уларнинг иштирокисиз тузилгани, кейин бекор қилинган бўлса-да, суд уларнинг гарданига 600 миллион сўмдан ортиқ сарф-харажатни қўяётганини маълум қилди. У шунингдек, мазкур сумма юзасидан керакли текширувлар ўтказилиб, ростдан ҳам шунча маблағ сарфланганми ёки йўқ, шуни аниқлаштиришда масъул идораларидан ташаббус кўрсатишни сўради.

бош шифокори ўринбосари Ҳамидулло Зокиров

Шундан сўнг изоҳ олиш мақсадида Андижон вилоят соғлиқни сақлаш бошқармасига бордик. Соғлиқни сақлаш вазирлиги давлат-хусусий шериклик ва тиббий туризмни ривожлантириш бош бошқармаси Андижон вилоят ҳудудий бўлими бош мутахассиси Нодирбек Хасанбоев ва Андижон вилоят соғлиқни сақлаш бошқармаси бош юрисконсульти Музаффар Рамазонов масала юзасидан саволларимизга жавоб беришди.

«Шифохона Андижон вилоят соғлиқни сақлаш бошқармаси балансида бўлмаган, лекин унинг таъсисчиси бўлган. Шу сабабли уларнинг иштирокисиз ижара шартномаси тузилган», деди Нодирбек Хасанбоев.

Бошқарма юрисконсулти Музаффар Рамазанов эса ҳозирда шифохона охирги чиқарилган Наманган вилоят иқтисодий суд қароридан норози экани ва назорат тартибида шикоят келтирганини тушунтирди.

Нодирбек Хасанбоев ва Музаффар Рамазонов

Шундан кейин тадбиркор Ҳадятилло Ниёзов билан суҳбатлашдик.

«Вилоят ҳокими Шуҳрат Абдураҳмонов ўтказган мажлисда ёрдамчиси Ғайратбек Мадакимовдан бу шифохона бошқарма балансида ёки йўқлигини сўраганида у шифохона ростдан ҳам соғлиқни сақлаш бошқармаси балансидалигини тасдиқлаганди. Шундан сўнг, шифохона менга «ноль» қийматда хусусийлаштириш учун берилганди.

Бинонинг пастки қисми масаласида гапирсам, у ер ташландиқ жой эди. Буни расмларда ҳам кўриш мумкин. Мен у жойни вилоят соғлиқни сақлаш бошқармаси бошлиғи билан келишиб таъмирладим. Барча ташкилотлардан рухсат олганман. Эски бир қаватли бино ҳам фойдаланишга яроқсиз эди. Маблағ сарфлаб бузиб ташладик. У ерда замонавий тиббий дастгоҳлар билан жиҳозланган 3 қаватли шифохона қуришни бошлаётган эдик.

Кейин улар ҳамма ерга мурожаат қилишди. Бош прокуратурадан масъуллар келиб, «ноль» қийматда бериш масаласини бекор қилишди. 3 қаватли ишлаб турган бинони эса ижарага олгандим. Унинг шартномаси ҳам бекор қилинди.

У ерда йилига жуда катта тушум бор. Шу сабабли шифохонага кўпчилик қизиқади. Мен шу пулларнинг ҳаммасини қонуний ҳисобга тушириб, фойда солиғини тўлаб, даромад олмоқчи эдим. Энг алам қиладигани, мен шифохона учун сарфлаган миллионлаб маблағимга куйиб қолмоқдаман», дейди тадбиркор.

тадбиркор Ҳадятилло Ниёзов

Нега таъмирлаш ишлари тегишли ташкилотлардан рухсат олинишидан олдин бошлаб юборилгани ҳақида сўраганимизда у бунга жавобан аризалар ўз вақтида берилгани, ҳужжатлаштириш ишларига анча вақт кетиб қолгани, шу туфайли қурилиш ишларини тезлаштириш мақсадида таъмирлашни бошлаб юборганини айтди.

Суҳбатдан кейин қўлимизда мавжуд ҳужжатлар билан танишдик. Тегишли рухсатлар олинмагани юзасидан шифокорлар прокуратура ва бошқа бир нечта ташкилотларга арз қилишган. Гигиена талабларига амал қилинмай беморларга муолажа қилинаётгани юзасидан Соғлиқни сақлаш вазири Алишер Шодмоновга мурожаат қилинган. Ҳолат бўйича чиқарилган сўнгги қарор юзасидан шифокорлар Олий судга ҳам назорат тартибида шикоят қилишган. Натижаларни кутишмоқда.

Шифокорларнинг айтишича, ҳозирда фойдаланилаётган бинонинг пастки қисми яроқсиз ҳолатда. Тадбиркор эса улар бу қисмни атайлаб шундай кўринишга келтиришганини айтмоқда.

Ҳужжатлардан маълум бўлишича, 2017 йилнинг 8 июль санасида хўжалик ҳисобидаги вилоят травматология ва ортопедия шифохонаси бош шифокори Н.Акбаров вилоят соғлиқни сақлаш бошқармаси бошлиғи А.Мадалиевга «ноль» қийматда хусусийлаштиришда амалий ёрдам сўраб хат киритган. Бир нечта эски бинолар, ер ва бошқалар умумий бўлиб 108 миллион 276 минг сўмга баҳоланган. Барчаси шундан бошланган.

Бу воқеалар натижасида тадбиркор ҳам ҳуқуқни муҳофаза қилувчи органларга мурожаат қилган. У ердан текширувчилар келиб беморлар ётган хоналарга кириб, уларга саволлар беришган. Лекин шифохона мутасаддиларига бирорта ҳужжат кўрсатишмаган. Текширувчиларнинг ташрифи телефон камераларида «муҳрланган».

Шу ўринда бир нечта саволлар пайдо бўлади. Нега масъуллар шифохона ҳақида тўлиқ маълумотга эга бўлмай туриб уни хусусийлаштиришга бериб юборган? Тадбиркор сарфлаган маблағ масаласи энди нима бўлади? Шифохона ҳудудида бузиш-қурилиш ишлари рухсат берилмасдан туриб бошлаб юборилгани ҳолатига тегишли ташкилотлар қандай чора кўради? Тушум масаласида тадбиркор унинг даврига келиб фойда ортгани, аввал яшириб кўрсатиб келинганини айтмоқда. Бу бўйича тушумни текширувчи ташкилотлар нима дейди? Видеога тушиб қолган, ҳужжат кўрсатмай, ўзини танитмай, беморлар хоналарини айланиб юрган ходимлар юзасидан расмий идоралар қандай изоҳ беради? Улар кимнинг буйруғи бўйича ва нима мақсадда келишганди?

Биз суриштирув ўтказиб қайтгач, вилоят ҳокими Шуҳрат Абдураҳмонов шифохонага бориб вазиятни ўзи ўргангани маълум бўлди. Бу ҳақда кейинроқ ўша ерда ишлайдиган шифокор хабар берди.

Вилоят ҳокими бу муаммоларга қандай чоралар кўргани ва шифохонанинг кейинги тақдири нима бўлгани ҳозирча номаълум.

Тегишли ташкилотлардан масалага ойдинлик киритишини кутиб қоламиз. Kun.uz воқеалар ривожини кузатиб боради.

Зафарбек Солижонов
Kun.uz мухбири

Кўпроқ янгиликлар