Вазирлар Маҳкамасининг “2019-2021 йилларда Қорақалпоғистон Республикасининг Бўзатов туманини комплекс ривожлантириш чора-тадбирлари тўғрисида”ги қарори лойиҳаси эълон қилинди.
Қорақалпоғистон Республикаси Вазирлар Кенгаши, Ўзбекистон Республикаси Инвестициялар ва ташқи савдо вазирлиги, Молия вазирлиги ҳамда бошқа давлат ва хўжалик бошқаруви органлари, хўжалик бирлашмалари ва тижорат банклари томонидан ишлаб чиқилган 2019-2021 йилларда Қорақалпоғистон Республикасининг Бўзатов туманини комплекс ривожлантириш чора-тадбирлари дастури маъқулланиши мумкин.
Дастурнинг асосий йўналишлари этиб қуйидагилар белгиланади:
Бўзатов туманини ижтимоий-иқтисодий ривожлантириш, аҳолини иш билан таъминланиш даражаси ва фаровонлигини ошириш;
қишлоқ хўжалиги соҳасида илғор технологияларни кенг жорий қилган ҳолда, ишлаб чиқариш ҳажми, ҳосилдорлик ва маҳсулот турларини ошириш;
ҳудуднинг табиий ва иқлим шароитига ҳос бўлган чорвачилик, шоличилик, балиқчилик ҳамда қизилмия илдизини етиштириш ва чуқур қайта ишлашни ривожлантириш;
ишлаб чиқариш ва ижтимоий инфратузилмани ривожлантириш, аҳолини ичимлик суви, электр энергияси ва табиий газ билан таъминлаш ҳамда бошқа ижтимоий-маиший хизматлар кўрсатиш даражасини яхшилаш.
Қуйидагилар:
2019-2021 йилларда Қорақалпоғистон Республикасининг Бўзатов туманини комплекс ривожлантириш чора-тадбирлари дастурининг молиялаштириш манбалари;
саноат маҳсулотлари ишлаб чиқариш қувватларини ишга тушириш бўйича инвестиция лойиҳаларининг манзилли рўйхати;
хизмат кўрсатиш ва сервис соҳаси инфратузилмасини ривожлантириш бўйича амалга ошириладиган лойиҳаларнинг манзилли рўйхати;
қишлоқ хўжалиги соҳасида ишлаб чиқаришни янада ривожлантириш бўйича амалга ошириладиган лойиҳаларнинг манзилли рўйхати;
муҳандислик-коммуникация тармоқларини янада ривожлантириш чора-тадбирлари;
ирригация ва мелиорация тизимини яхшилаш чора-тадбирлари;
ижтимоий инфратузилмани янада ривожлантириш чора-тадбирлари тасдиқланади.
Ўзбекистон Республикаси Инвестициялар ва ташқи савдо вазирлиги, Қорақалпоғистон Республикаси Вазирлар Кенгаши, Бўзатов тумани ҳокимлиги, вазирлик ва идоралар, хўжалик бирлашмалари ва тижорат банклари лойиҳалар ташаббускорлари билан биргаликда Дастурдаги кўрсаткичлардан келиб чиққан ҳолда тармоқ жадвалларини ишлаб чиқадилар ва тасдиқлайдилар.
Бунда, Дастурдаги лойиҳа ҳужжатларини ишлаб чиқиш, қурилиш-монтаж ишларини бажариш муддатлари, технологик асбоб-ускуналарни келтириш ва уларни ўрнатиш ҳамда қувватларни фойдаланишга топширишда муддатларни белгиланиши назарда тутилади.
“Ўзтрансгаз” АЖ, “Ҳудудий электр тармоқлари” АЖ, Қорақалпоғистон Республикаси Вазирлар Кенгаши билан биргаликда Дастур доирасида амалга ошириладиган инвестиция лойиҳаларини электр ва табиий газ тармоқларига ўрнатилган тартибда уланишини ҳамда узлуксиз етказиб берилишини таъминлайдилар.
Ўзбекистон Республикаси Қурилиш вазирлиги Қорақалпоғистон Республикаси Вазирлар Кенгаши, Бўзатов тумани ҳокимлиги билан биргаликда 2020 йилда қайта ташкил қилинаётган Бўзатов туманининг марказини ободонлаштириш, кўкаламзорлаштириш, муҳандислик-коммуникация ва ижтимоий инфратузилма объектларини назарда тутган ҳолда Бош режасини қайта кўриб чиқиб, тузатиш киритиш ва батафсил режалаштириш лойиҳасини ишлаб чиқади.
Қорақалпоғистон Республикаси Вазирлар Кенгаши:
Ўзбекистон Республикаси Ер ресурслари, геодезия, картография ва давлат кадастри давлат қўмитаси, Қишлоқ хўжалиги вазирлиги, Ўзбекистон фермер, деҳқон хўжаликлари ва томорқа ер эгалари кенгаши, Сув хўжалиги вазирлиги, Бўзатов тумани ҳокимлиги билан биргаликда бир ой муддатда туман ҳудудида қишлоқ хўжалигига мўлжалланган ер майдонларини тўлиқ хатловдан ўтказиб, фермер ва бошқа қишлоқ хўжалиги корхоналарини Вазирлар Маҳкамасининг 2013 йил 31 январдаги 22-сонли қарори асосида янгидан ташкил этилишини таъминлайди;
“Ўзбекбалиқсаноат” уюшмаси, Инвестициялар ва ташқи савдо вазирлиги, тегишли вазирлик ва идоралар билан биргаликда 2020-2021 йилларда “Бўзатов Даўиткўл балиқ кластер” масъулияти чекланган жамияти томонидан балиқ етиштириш ва қайта ишлаш бўйича кластерини ташкил этиш;
Сув хўжалиги вазирлиги, Ветеринария ва чорвачиликни ривожлантириш давлат қўмитаси, Қишлоқ хўжалиги вазирлиги, Инвестиция ва ташқи савдо вазирлиги билан биргаликда 2020-2021 йилларда ҳудудни сув ресурслари билан таъминланганлик даражасидан келиб чиқиб:
“Бўзатов шоли” фермер хўжалиги томонидан шоличилик кластерини ташкил этиш;
“Бўзатов чорва шоли кластер” масъулияти чекланган жамияти томонидан чорвачилик ва шоличилик кластерини ташкил этиш чораларини кўради.
Қишлоқ хўжалиги вазирлиги ва Сув хўжалиги вазирлиги билан биргаликда туман ҳудудида қишлоқ хўжалигига мўлжалланган ер майдонларида сув тежовчи технологияларни босқичма-босқич жорий қилинишини таъминлайди.
Фармацевтика тармоғини ривожлантириш агентлиги, Қишлоқ хўжалиги вазирлиги билан биргаликда 2020-2022 йилларда Бўзатов туманида қизилмия ўсимлигини плантация усулида етиштириш ва уни чуқур қайта ишлашни янада ривожлантириш бўйича “Йўл харитаси”ни ишлаб чиқиб, тасдиқлайди.
Сув хўжалиги вазирлиги, Қорақалпоғистон Республикаси Вазирлар Кенгаши, Иқтисодиёт ва саноат вазирлиги, Молия вазирлиги билан биргаликда Амударё ва Еркин каналларидан КС-1 орқали “Кусханатаў” ОФЙ, “Еркиндарья” ОФЙ ҳамда “Аспантай” ОФЙ ҳудудларидаги яйлов ва кўллар учун сув таъминотини яхшилаш бўйича асосланган таклиф ишлаб чиқиб, Вазирлар Маҳкамасига киритилишини таъминлайди.
Ўзбекистон Республикаси Инвестициялар ва ташқи савдо вазирлиги, Давлат солиқ қўмитаси, Ер ресурслари, геодезия, картография ва давлат кадастри давлат қўмитаси, Давлат мулкини бошқариш агентлиги, Қорақалпоғистон Республикаси Вазирлар Кенгаши билан биргаликда Бўзатов туманидаги аввал хусусийлаштирилган давлат объектлари, шунингдек бошқа бўш турган ер майдонлари ва бино-иншоотлар ҳолати тўлиқ хатловдан ўтказади.
Хатлов натижаларига кўра, объектлардан самарали фойдаланиш ёки фойдаланмай турган объектларни қонунчиликка мувофиқ маҳаллий ҳокимлик балансига ўтказиш ёки қайтариб олиш бўйича чора-тадбирлар дастурини ишлаб чиқиб тасдиқлайди.
Ўзбекистон Республикаси Инвестиция ва ташқи савдо вазирлиги, Иқтисодиёт ва саноат вазирлиги, Молия вазирлиги ҳар йили асосий кўрсаткичларни аниқлаштириб ва янгилаб борган ҳолда Ўзбекистон Республикаси Инвестиция дастури параметрларини шакллантиришда ушбу қарорда назарда тутилган бюджет маблағлари ҳисобига молиялаштириладиган лойиҳаларни инобатга олади.
Туман ҳокимига, истисно тариқасида 2022 йил 1 январга қадар Қорақалпоғистон Республикаси Вазирлар Кенгаши билан келишган ҳолда амалга ошириладиган қуйидаги ҳуқуқлар берилади:
а) аукцион савдоларисиз, инвестор билан тўғридан-тўғри музокаралар ўтказиш орқали суғориладиган экин ерлар тоифасига кирмайдиган, лекин қишлоқ хўжалиги ва ўрмон хўжалиги ерлари тоифасига кирадиган ер участкаларидан тадбиркорлик ва шаҳарсозлик фаолияти учун инвестициявий ва ижтимоий мажбуриятларни белгилаган ҳолда доимий фойдаланиш ҳуқуқи билан ажратиш;
б) хорижий инвестор томонидан қонун ҳужжатларида белгиланганидан қўшимча солиқ ва божхона имтиёзлари ва преференцияларини бериш талаби қўйилмаган тақдирда чет эл инвестицияси улуши бўлган инвестиция лойиҳаларини амалга оширишда чет эл инвесторлари билан инвестиция шартномалари тузиш;
в) республика ва маҳаллий бюджетдан молиялаштириладиган, туманда қурилиш, реконструкция ва капитал таъмирлаш ишларини амалга ошириш учун пудрат ташкилотларини танлашда энг мақбул таклифларни танлаб олиш йўли билан, танлов савдоларини ўтказмасдан пудрат ва лойиҳа ташкилотларини белгилаш.
Шундай тартиб ўрнатиладики, унга мувофиқ:
а) 2022 йил 1 январга қадар Бўзатов туманида рўйхатдан ўтган, айнан ушбу туманда фаолият олиб борувчи тадбиркорлик субъектларига саноат, хизмат кўрсатиш ва қишлоқ хўжалиги соҳаларида лойиҳаларни амалга ошириш учун тижорат банклари кредитлари бўйича фоизли харажатларнинг бир қисмини қоплаш учун Ўзбекистон Республикаси Кичик бизнес ва тадбиркорликни ривожлантириш Агентлиги ҳузуридаги Тадбиркорлик фаолиятини қўллаб-қувватлаш давлат жамғармаси томонидан белгиланган тартибда компенсация берилади;
б) 2022 йил 1 январга қадар Бўзатов туманида янги иш ўринларини ташкил этишни назарда тутувчи кичик лойиҳалар Ўзбекистон Республикаси Бандликка кўмаклашиш давлат жамғармаси маблағлари, субсидия ва грантлар ажратиш ҳисобидан амалга оширилади;
в) дастурда назарда тутилган объектлар қурилиш-монтаж ишларини лойиҳа-смета ҳужжатларини ишлаб чиқиш билан бир вақтда амалга оширилади.
г) Ўзбекистон Республикаси Давлат геология ва минерал ресурслар қўмитаси Инвестициялар ва ташқи савдо вазирлиги, Қорақалпоғистон Республикаси Вазирлар Кенгаши, Бўзатов тумани ҳокимлиги билан биргаликда инвесторларни жалб этиш учун:
Қорақалпоғистон Республикасида, шу жумладан туманда мавжуд фойдали қазилмалар захиралари ҳақидаги маълумотларни юборади;
туманда геология-қидирув ишлари натижасида аниқланган фойдали қазилмалар захиралари ҳақидаги маълумотларнинг тақдим этиб борилишини таъминлайди;
д) Ўзбекистон Республикаси Давлат геология ва минерал ресурслар қўмитаси томонидан туманда аниқланган фойдали қазилмалар ҳақидаги маълумотлар асосида:
Ўзбекистон Республикаси Инвестициялар ва ташқи савдо вазирлиги инвестиция лойиҳа паспортларини тайёрлайди ва мунтазам равишда туманга тўғридан-тўғри хорижий инвестицияларни жалб этиш мақсадида Ташқи ишлар вазирлигига тақдим этади ҳамда Инвестиция порталига жойлаштириб боради;
Ўзбекистон Республикаси Ташқи ишлар вазирлиги инвестиция лойиҳа паспортлари асосида хорижий инвестицияларни жалб этиш чораларини кўради.
Қорақалпоғистон Республикаси Вазирлар Кенгаши, Ўзбекистон Республикаси Давлат мулкини бошқариш агентлиги, Молия вазирлиги, тегишли вазирлик ва идоралар билан биргаликда, давлат ва хўжалик бошқаруви органлари, тижорат банклари Бўзатов туманидаги бўлинмалари ва филиалларини ташкил этиш, уларни зарур бино ва иншоотлар ҳамда моддий-техника воситалари билан таъминлаш бўйича Ўзбекистон Республикаси Вазирлар Маҳкамасига таклиф киритади.
Ўзбекистон Республикаси Соғлиқни сақлаш вазирлиги, Қорақалпоғистон Республикаси Вазирлар Кенгаши, Олий ва ўрта таълим вазирлиги тегишли идора ва ташкилотлар билан биргаликда:
Қорақалпоғистон Республикаси Жўқорғи Кенгашининг Ўзбекистон Республикаси Президентнинг 2019 йил 6 сентябрдаги ПФ-5812-сонли Фармонига асосан Тошкент педиатрия тиббиёт институти Нукус филиалига берилган Қозонкеткен қишлоқ хўжалиги касб-ҳунар коллежи негизида Бўзатов тумани касб-ҳунар мактабини ташкил этиш;
Қозонкеткен қишлоқ хўжалиги касб-ҳунар коллежи ётоқхона биноси ва иккинчи ўқув биноси ва эгаллаган ер майдонлари оператив бошқарув ҳуқуқи асосида Бўзатов тумани ҳокимлиги тасарруфига ўтказиш бўйича таклифи маъқулланиши мумкин.
Шунингдек, Бўзатов тумани тиббиёт бирлашмасининг бўш турган қисмида Тошкент педиатрия тиббиёт институти Нукус филиалининг кўп тармоқли ўқув маркази ва амалиёт полигонини ташкил этиш юзасидан таклиф ишлаб чиқиб, Вазирлар Маҳкамасига киритилишини таъминлайди.
Ветеринария ва чорвачиликни ривожлантириш давлат қўмитаси, Қорақалпоғистон Республикаси Вазирлар Кенгаши, Инвестиция ва ташқи савдо вазирлиги билан биргаликда Бўзатов туманида туячиликни ривожлантириш учун кейинги йилларда халқаро молия институтлари ва хорижий ҳукумат молия ташкилотларининг кредитлари ва грант маблағлари, хорижий кредит линияларини жалб этиш чораларини кўради.
Ўзбекистон Республикаси Олий ва ўрта махсус таълим вазирлиги, Халқ таълими вазирлиги, Соғлиқни сақлаш вазирлиги, Иқтисодиёт ва саноат вазирлиги Ветеринария ва чорвачиликни ривожлантириш давлат қўмитаси билан биргаликда Тошкент педиатрия тиббиёт институти Нукус филиали, Самарқанд ветеринария медицинаси институти Нукус филиали, Нукус давлат педагогика институти бакалавриатининг 2020/2021 ўқув йили учун кундузги таълим шакли бўйича давлат буюртмаси асосида ўқишга қабул қилиш параметрларига таклифларни шакллантиришда Бўзатов туманида камида 5 йил ишлаб бериш шарти билан тегишли таълим йўналишлари бўйича Бўзатов тумани бўйича давлат гранти асосида алоҳида мақсадли қабул кўрсаткичларини кўзда тутади.
Ўзбекистон Республикаси Молия вазирлиги, Иқтисодиёт ва саноат вазирлиги, Қорақалпоғистон Республикаси Вазирлар Кенгаши билан биргаликда Бўзатов тумани бюджетининг прогноз параметрларини белгилайди.
Қорақалпоғистон Республикаси Вазирлар Кенгаши, ТИФ “Ўзмиллийбанк” билан биргаликда Бўзатов тумани аҳолиси эҳтиёжларини қондириш қувватига эга бўлган ихчам замонавий савдо мажмуасини барпо этиш учун зарур миқдорда кредит маблағлари ажратилишини ҳамда 2020 йил 1-чораги якуни билан ишга туширилишини таъминлайди.
Ўзбекистон Республикаси Мактабгача таълим вазирлиги, Қорақалпоғистон Республикаси Вазирлар Кенгаши, “Ўзсаноатқурилишбанк”, Бўзатов тумани ҳокимлиги билан биргаликда Ўзбекистон Республикаси Президентининг 2018 йил 5 апрелдаги ПҚ-3651-сонли қарори асосида туманда давлат хусусий шерикчилик асосида 75 ўринлик мактабгача таълим ташкилотини 2020 йилнинг 2-чорагида ишга туширилишини таъминлайди.
Қорақалпоғистон Республикаси Вазирлар Кенгаши, Бўзатов тумани ҳокимлиги 2019 йил якунига қадар:
туман ҳудудида янги замонавий автомобилларга газ тўлдириш компрессор станциясини жойлаштириш юзасидан таклиф ишлаб чиқиб, Энергетика вазирлигига ўрнатилган тартибда таклиф киритилишини таъминлайди;
Ўзбекистон Республикаси Энергетика вазирлиги Ўзбекистон Республикаси Вазирлар Маҳкамасининг 2017 йил 11 октябрдаги 815-сонли қарори билан тасдиқланган 2017-2019 йилларда ҳудудларда автомобилларга газ тўлдириш компрессор станцияларини қуриш мақсадли кўрсаткичларига ўзгартириш киритиш бўйича таклиф ишлаб чиқиб, Вазирлар Маҳкамасига киритилишини таъминлайди.
Ўзбекистон Республикаси Соғлиқни сақлаш вазирлиги, Иқтисодиёт ва саноат вазирлиги, Молия вазирлиги, Қорақалпоғистон Республикаси Вазирлар Кенгаши билан биргаликда, туман марказий шифохонасини таъмирлаш, зарур моддий-техника шу жумладан, жонлантириш (реанимация) ва туғуруқ бўлимларини зарур замонавий анжом ва юқори малакали мутахассислар билан таъминлаш юзасидан таклиф ишлаб чиқиб, Вазирлар Маҳкамасига киритади.
“Ўзтрансгаз” АЖ, Қорақалпоғистон Республикаси Вазирлар Кенгаши билан биргаликда:
туманда аҳолини табиий газ билан барқарор таъминлаш мақсадида туман ҳудудидан алоҳида газ тақсимлаш станциясини қуриш ишларини ва “Нукус-Чимбой” юқори босимдаги магистрал газ тармоғидан ушбу объектгача 34 км юқори босимдаги газ тармоғини тортиш;
тумандаги мавжуд газ тармоқларини хатловдан ўтказиб, хатлов натижасига кўра ўрнатилган тартибда таъмирлаш ишлари амалга оширилади.
“Ўргенчтрансгаз” шўъба корхонасининг туманда битта чорва комплексини ташкил этишда кафил ташкилот сифатида қатнашиш тўғрисидаги таклифи маъқулланиши мумкин.
