Туркия Сурияда ҳарбий амалиёт бошлади

Жаҳон 18:27 / 09.10.2019 30493

Туркия президенти Ражаб Тоййиб Эрдўған Сурияда ҳарбий амалиёт бошлангани тўғрисида маълум қилди.

NTV телеканали хабарига кўра, Туркия Суриядаги Фирот дарёсидан шарқда ҳарбий операция бошлаган.

Ўз навбатида, Сурия давлат телевидениеси маълумотига кўра, Туркия армияси мамлакат шимолидаги Рас-ал-Айн шаҳрига авиазарбалар берган.

Операциядан мақсад - курд ҳарбий бўлинмаларини Сурия шимолидаги ҳудудлардан сиқиб чиқариш ва «хавфсиз ҳудуд» ташкил этиш. Бу ҳудудга 3,6 миллион нафарга яқин суриялик қочқинларни жойлаштириш режалаштирилган.

Сурия давлат телевидениеси маълумотига кўра, туркларнинг авиацияси Рас-эл-Айн шаҳрига зарбалар беришга улгурган. Шаҳар атрофидаги ҳудудда жойлашган Ал-Мажрафа қишлоғи, шунингдек, ал-Машрафа ва Харбат ал-Банат қишлоқларидаги «Сурия демократик иттифоқи» (SDF) позициялари ҳам ҳужумга учраган.

Туркия ҳукумати бу ҳарбий амалиётга «Тинчлик манбаи» деб ном берди.

Бундан олдин, Туркия ўз ҳарбийларини Сурия ҳудудига киритишни бошлагани хабар қилинганди.

Вашингтон «рухсат берди»

Авваллари бу ҳудудларда америкаликларнинг кичик ҳарбий бўлинмалари жойлашганди. Курдлар ИШИДга қарши уруш вақтида коалиция кучлари ва Сурия мухолифатига ёрдам кўрсатганди.

Аммо турклар ҳужуми арафасида АҚШ президенти Дональд Трамп америкалик ҳарбийларни бу ҳудуддан олиб чиқишга кўрсатма берди - бу эса туркларнинг курдларга қарши ҳарбий амалиёт бошлаши учун «яшил чироқ» вазифасини ўтади.

«Сурия демократик иттифоқи» коалициясига бирлашган курдлар бу қарорни танқидий қабул қилишди ва буни «орқадан зарба бериш» дея баҳолашди.

Дональд Трамп бу норозиликлар ортидан агар Анқара курдларга қарши юриш бошласа, Туркия иқтисодиётини яксон этиш билан таҳдид қилди.

Маълумот учун, Туркия Сурия шимолидаги курдларни ўз миллий хавфсизлигига таҳдид сифатида кўради.

Туркия ҳукумати Суриядаги курдларни ўн йиллардан буён Туркия ҳудудида ҳукуматга қарши кураш олиб бораётган Курдистон ишчилар партиясига бўйсунувчи террорчилар сифатида билади. Сурия курдлари эса бу айбловни рад этишган.

Сурия шимолидаги курдлар ИШИД билан жангларда асирга олинган минглаб собиқ жангарилар ва уларнинг оилалари сақланадиган лагерларни назорат қилади. Туркиянинг ҳужуми эса бу асирларнинг қочиб кетишига ва яна бир жиддий хавф пайдо бўлишига олиб келиши мумкин.

Кўпроқ янгиликлар