AQSh prezidenti Donald Tramp Amerika kuchlarining Suriyadan olib chiqib ketilishi jarayoni boshlanganiga qaramay, AQSh bu mamlakatdagi kurdlarini tashlab qo‘ymasligini aytdi. U bu haqda o‘zining Twitter sahifasida yozdi.

"Biz Suriyani tark etish jarayonida bo‘lishimiz mumkin, lekin biz hech qanaqasiga o‘ziga xos xalq va ajoyib jangchilar bo‘lgan kurdlarni tashlab qo‘ymadik", deb yozdi Tramp.
"Biz kurdlarga mablag‘ va qurollar bilan yordam beryapmiz!" - deya qo‘shimcha qildi u.

Avvalroq “Suriya demokratik kuchlari” qurolli koalitsiyasi qo‘mondonligi amerikalik harbiy xizmatchilarning Ras-al-Ayn va Tell-Abyad shaharlaridan kutilmaganda olib chiqib ketilishi kurdlar uchun ortdan berilgan zarba bo‘lganini bildirgandi.