Фахрий унвонларга эга спортчилар ҳоким маслаҳатчилари бўлади

Спорт 17:30 / 30.09.2019 6442

Вазирлар Маҳкамасининг “Андижон вилоятида ёшларни жисмоний тарбия ва спортга жалб қилиш тизимини такомиллаштириш ҳамда мавжуд спорт иншоотлари қувватидан самарали фойдаланиш чора-тадбирлари тўғрисида”ги қарори қабул қилинди.

Ҳужжат билан қуйидагилар:

Андижон вилоятида ёшларни жисмоний тарбия ва спорт билан шуғулланишга жалб қилиш, мавжуд спорт иншоотларининг қувватидан самарали фойдаланиш, олис ва чекка қишлоқларда спорт иншоотларини барпо этиш чора-тадбирлари режаси;

Андижон вилоятида ёшларни жисмоний тарбия ва спорт билан шуғулланишга жалб қилиш, мавжуд спорт иншоотларининг қувватидан самарали фойдаланиш, олис ва чекка қишлоқларда спорт иншоотларини барпо этиш чора-тадбирлари режаси амалга оширилишини ташкил этиш ва назорат қилиш бўйича ишчи гуруҳи таркиби тасдиқланди.

Қуйидагилар:

а) Ўзбекистон Республикаси Жисмоний тарбия ва спорт вазирлиги, Ўзбекистон Миллий олимпия қўмитаси ва Андижон вилояти ҳокимлигининг:

“Халқаро тоифадаги Ўзбекистон спорт устаси” унвонига, “Ўзбекистонда хизмат кўрсатган спорт устози”, “Ўзбекистонда хизмат кўрсатган спортчи” фахрий унвонларига эга бўлган спортчилар, Олимпия ва Осиё ўйинлари, жаҳон чемпионати, шунингдек, Ўзбекистон чемпионати совриндорларини Андижон вилоятининг туман (шаҳар)лари ҳокимларига жамоатчилик асосида жисмоний тарбия ва спорт масалалари бўйича маслаҳатчи этиб бириктириш;

жисмоний тарбия ва спорт масалалари бўйича бириктирилган маслаҳатчиларнинг асосий вазифалари сифатида маҳаллий ёшларни жисмоний тарбия ва оммавий спортга кенг жалб қилиш, уларнинг бўш вақтларини мазмунли ўтказиш юзасидан тегишли туман (шаҳар) ҳокимликларига методик, амалий ҳамда ташкилий жиҳатдан ёрдам беришдан иборат этиб белгилаш;

б) жисмоний тарбия ва спорт йўналиши мавжуд олий ва ўрта махсус таълим муассасалари битирувчиларининг олий ва ўрта махсус таълим муассасаларида педагогик амалиёт ўташини ташкил этиш тўғрисидаги таклифларига розилик берилди.

Кўпроқ янгиликлар