Зидан ва Симеоне дербига қандай тайёрланганди? Мадрид дербиси нега зерикарли бўлгани ҳақида

Спорт 15:20 / 29.09.2019 9581

Икки мураббий бир-бирининг режасини бузиш билан банд бўлди - бундан бошқа режа йўқ эди.

Испания чемпионати. Лига 1. 7-тур
«Атлетико» — «Реал» — 0:0

«Атлетико» (Мадрид): Облак, Триппьер, Савич, Хименес, Лоди (Лемар, 61), Витоло (Корреа, 46), Сауль, Коке, Партей, Диегу Коста, Жоау Феликс (Льоренте, 70).
«Реал» (Мадрид): Куртуа, Карвахаль, Серхио Рамос, Варан, Начо, Каземиру, Кроос, Вальверде (Модрич, 68), Бэйл, Бензема (Йович, 88), Азар (Хамес Родригес, 77).
Огоҳлантиришлар: Начо, 22. Варан, 69. Партей, 90+3.
Ҳакам: Гонсалес Гонсалес.
28 сентябрь. Мадрид. «Ваньда Метрополитано» стадиони.

7:3 ҳисобидан 2 ой ўтиб

Бу ўйинда ғолиб чиқиш - икки жамоа учун ҳам биринчи ўринни эгаллаш ва тўғридан-тўғри рақибни бир неча очколик фарқ билан ортда қолдириш имконини берарди. «Атлетико» ғалаба қозонса «Реал»дан 2 очко олдинда бўлар, «Реал» ғалаба қозонса биринчи ва иккинчи ўрин орасидаги фарқ 3 очкони ташкил этарди. Шу билан биргаликда, дуранг ўйнашнинг ҳам у қадар зарари йўқ эди: биринчи ва иккинчи ўринни эгаллаб турган бу жамоалар орасидаги минимал фарқ сақланиб қоларди.

Қизиқ, бу мураббийлардан қайси бири — Диего Симеоне ёки Зинедин Зидан — мавсумдаги биринчи дерби олдидан ўз футболчилари хотирасидан шу йил 27 июлида Американинг Ист-Рутерфорд шаҳрида Халқаро чемпионлар кубоги доирасида бўлиб ўтган ўйинни ўчириб юборишни истаган экан? Ўшанда «Атлетико» 7:3 ҳисобида ғалаба қозонгани, танаффусга қадар 5:0 ҳисоби қайд этилгани, ўйинда покер қайд этган Диего Костанинг якунда майдондан четлатилиши — бу барча учун ақлбовар мотивация манбаи эди. «Матрасчилар» учун — ўз кучлари ва имкониятларига ишонч, «Реал» учун — қасос олишга интилиш иштиёқи. Икки ой олдинги ўйин шунчаки ўртоқлик учрашуви мақомида бўлгани муҳим эмас.

«Реал» мавсум бошида энг кўп танқидга учраётган топ-клубдир, аммо айнан шу жамоа 6 турдан кейин турнир жадвалини бошқариб тураётганди. Тўғри, ўз вақтида бу клубни чемпион қилган Фабио Капелло томошабоп ўйин кўрсатмагани учун истеъфога чиқариб юборилганди. Аммо Жозе Моуриньо қайтиши ҳақидаги ва етакчи футболчиларнинг бош мураббийга ишончи сўнгани ҳақидаги миш-мишларга қарамай, Зиданга жиддий эътироз билдиришга асос йўқ.

У «Атлетико»га қарши ўйиндан аввал берган интервьюсида мураббий ҳам киноя қилди. «Фақат бир нарсани айтишим мумкин, «Реал»дагилар ҳам бошқалар каби кўп ишлашяпти», — деди Зизу дерби арафасида.

Юқори прессинг – Зиданга хос бўлган услуб эмас. Аммо бу сафар у шогирдларига рақиб ҳужумларини майдоннинг иккинчи қисмидаёқ бўғиб ташлашни кўрсатма қилганди. Дастлабки 15 дақиқада «Реал» футболчилари 8 марта мезбонлар ҳужумини тўхтатишди, шундан бештаси – рақиб ҳудудида. Мақсад аён эди: Фелишга узатма берилишига йўл қўймаслик. Шу орқали «Атлетико» секинлик билан позицион ҳужум уюштираётганида меҳмонлар ҳимоядаги позицияларига қайтишга улгуришарди.

«Реал» кўпроқ чап қанотда фаол ўйин кўрсатди. Бу мураббий кўрсатмаси экани кўриниб турарди: дастлабки ярим соат ичида Кроос-Начо-Азар учбурчаги жами 81та пас узатди, бу вақтда ўнг қанотдаги Карвахаль-Вальверде-Бэйл биргаликда – 48 пас амалга оширишди. Бундай кўрсатманинг бир неча сабаблари бор эди, бу сабаблар ҳам ҳужум билан, ҳам ҳимоя билан боғлиқ. 

Ҳужумдан бошлаймиз. Вальверде ярим ҳимоячилар учлигида ўнг қанотда ўйнади, у Кроосга симметрик жойлашди, аммо бутунлай бошқа функцияни бажарди. У тўпга эгалик қилишдан кўра, рақибга босим уюштириш билан шуғулланди. Худди шу қанотда Бэйл – қарши ҳужумлар учун мос футболчи ҳаракат қилди. Тўпни чап қанотда айлантириб юришдан мақсад шу томонга «Атлетико» ҳимоячиларининг эътиборини жалб қилиб, кейин тезкорлик билан тўпни нариги қанотга ўтказиш ва Бэйл бўш ҳудудлардан фойдаланишига эришиш эди. 

Тўпни чап қанотда ушлаб туришнинг ҳимоявий томондан ҳам сабаблари бор эди. Менди ва Марсело жароҳатдалиги туфайли чап қанотда Начо туширилди. У универсал, аммо барибир кўпроқ ўнг оёғида ўйновчи футболчи. «Атлетико»да эса ўнг қанот тезкор Фелишга тегишди, у тезкор бўлиш билан биргаликда жамоанинг энг креатив футболчиси, қолаверса жамоанинг ўнг қанотидаги Триппьер ҳам фаол равишда ҳужумга қўшила олади. Триппьер исталган вақтда ҳужумга чиқиши мумкинлиги «Реал»нинг чап қанотини доимий равишда таҳдидда ушлаб турарди.

Режа мантиқий эди, аммо биринчи бўлимда бу режани иш берди дейиш қийин. Азар Триппьерни алдаб ўтиб, рақиб жарима майдонига ёриб кирган вақтдагина меҳмонлар хавфли вазиятга эга бўлишди. Кўп ҳолларда Зидан шогирдлари олдинга ўта олишмади: уч вазиятда бельгиялик футболчи шунчаки тўпни йўқотди, бошқа ҳолатларда эса таваккал қилишни истамаган ҳолда тўпни орқага узатди. Ҳимояда ҳам ҳаммаси кўнгилдагидек эмасди: «Атлетико» барибир ўнг қанотдан кам бўлсада хавфли ҳужумлар уюштириб турди. Ўйиннинг 8-дақиқасида Фелиш олдинга ташланди ва рақиб дарвозабони билан яккама-якка чиқиб борди, аммо унинг зарбаси дарвоза устуни ёнидан ўтиб кетди. Бу вазиятда Начо ортга қайтишга улгурмаганди. Бошқа вазиятда эса мезбонлар юқори прессингни ёриб ўтиб, олдинга чиқишди, Начо Триппьерни йиқитишга мажбур бўлди ва 23 дақиқадаёқ сариқ карточка олди. Биринчи бўлим охирида Триппьер яна Начодан ўтиб кетиб, рақиб жарима майдонига хавфли узатма берди, бу вазиятда Куртуа тўпни эгаллаб олди. Битта ҳудуддан учта хавфли ҳужум уюштирилиши шундан дарак берардики, Симеоне «Реал»нинг заиф нуқтасини пайқаб қолган ва шогирдларига айнан шу ердан ёриб ўтишни кўрсатма қилганди.

Аммо Симеоненинг режаси ҳам ўхшамади: «Атлетико» ҳужумга зўр берди, аммо рақиб дарвозасига деярли аниқ зарба бера олмади. Аввалига Диего қанот чизиғи ёнида туриб Витолога бақириб турди, 25-дақиқадан кейин уни ўнг қанотга ўтказиб, Коке билан жойини алмаштирди ва Коке чап қанотни жонлантиришга келди.  Витолонинг ўнг қанотдаги ҳаракатлари ҳам мураббийни қаноатлантирмади ва танаффусда уни Анхель Корреа алмаштирди, у чап қанотдан жой олди, Коке ўнг қанотга қайтди. 

Икки жамоада ҳам ҳужумлар яхши уюштирилмади, танаффусдан кейин Симеоне футболчиларининг позицияларини алмаштира бошлади. Аввалига Лоди ўрнига Лемар майдонга туширилди: Лодининг майдондаги ўрнини - чап қанотни Сауль эгаллади, кўп ўтмай Фелишнинг ўрнига Льоренте туширилди, натижада ҳужум марказида Костага Корреа шериклик қилди. Лемар эса марказда жойлашди, Сауль бутун чап қанотни ёпишга масъул бўлди. Тўпсиз 4-4-2 схемаси, тўп билан 3-4-1-2 схемаси ҳаракатланди. Аммо Симеоне ҳужум чизиғига туширилган янги футболчиларга кўрсатма бериш билан машғул бўлганида, «Реал» ўйиндаги энг хавфли вазиятни яратди.

Негадир Начога ҳеч ким халал бермади ва у хотиржамлик билан тўпни ўнг оёғига мослаб олиб, уни рақиб жарима майдонига узатди. Унинг паси Бенземанинг бошини топди, франциялик ҳужумчи бурчак томон зарба йўллади, аммо Облак турнинг энг яхши сейвларидан бирини амалга оширди – «Реал» эса битта эпизод билан ғалабага эришишига бир бахя қолди. 

«Реал»да Модрич Вальверденинг, Хамес эса Азарнинг ўрнини эгаллаши билан жамоа тўпсиз яхшироқ ҳаракатлана бошлади (хорватиялик футблчи кучли прессинг учун туширилганди), аммо тўп билан ҳаракатланишда жамоа оқсай бошлади. Иккинчи бўлимнинг иккинчи қисмида меҳмонлар тўпни топшириб қўйишди. Симеоне эса, ҳужумни кучайтириш учун янги футболчиларни майдонга ташлаган бўлсада яримҳимоя чизиғи ҳужум вакилларини зарба бериш позициясига чиқара олишмади. Куртуа супермен ролига киришишига ҳожат бўлмади. Бунда асосий ишни ҳимоячилар, айниқса бу оқшомни идеал даражада ўтказган Вараннинг хизмати катта бўлди. Куртуа дарвозасига йўлланган илк аниқ зарба 89-дақиқада қайд этилди - Кокенинг узоқ масофадан йўллаган зарбаси дарвозабонга у қадар катта қийинчилик туғдирмади.

«Реал» қаторасига учинчи ўйинда дарвозасини дахлсиз сақлади. Зидан даврида бундай ҳолат илк марта кузатилмоқда. Жамоа Ла Лига доирасидаги ўйинларда ўз дарвозасига зарба беришга 269 дақиқа давомида йўл қўймагани чемпионат учун сўнгги ўн йилликдаги рекорддир.

Шу тариқа, икки мураббий ҳам бир-бирининг режаларини чиппакка чиқарди ва биттадан очкога эга бўлишди. Бундай ўйинларда голлар бўлиши учун дарвозабонларнинг хатолари ёки рикошетлар рўй бериши, ёки кўплаб стандарт вазиятлар ижро этилиши керак бўлади. Мадрид дербисида эса бундай ҳолатлар кузатилмади, ўйиндан эса битта хавфли вазият яратилди: Бенземанинг бош билан йўллаган зарбаси. Тенг ўйин, бунинг учун нафақат Зиданни, балки ўйин давомида меҳмонлар ҳимоясини қандай қилиб бузиб ўтиш ҳақида ўйлаган Симеонени ҳам эътироф этиш керак.

«Реал», «Атлетико» ва «Барселона» бир-биридан минимал фарқларни сақлаган ҳолда давом этади. Ҳали ҳеч бир жамоа ўз ўйинини бир тизимга қўйиб ололгани йўқ. Бош соврин учун кураш ушбу уч жамоа ўртасидагина кечади, дейишга ҳали эрта, бу жамоаларнинг очко йўқотишлари бошқа жамоаларга ҳам имконият тақдим этмоқда.

Турнир жадвалидаги ҳолат

Кўпроқ янгиликлар