Жак Ширак вафот этди

Жаҳон 15:10 / 26.09.2019 54513

Франциянинг собиқ президенти Жак Ширак 86 ёшида оламдан ўтди. Бу ҳақда марҳум сиёсатчининг оиласи вакилларига асосланган ҳолда AFP хабар тарқатди.

«Бугун тонгда яқинлари қуршовида ҳаётдан кетди. Тинч ором олсин», — дея Ширакнинг куёви Фредерик Сала-Барунинг сўзларини келтирмоқда агентлик.

Жак Ширак 1932 йилнинг 29 ноябрида Парижда туғилган. Карно ва Людовик Буюк лицейида у рус тилини ўрганган, ўсмир ёшида Пушкиннинг «Евгений Онегин» поэмасини француз тилига ўгирган. 

У 1956—1957 йилларда армияда хизмат қилган ва Жазоирдаги урушда қатнашиб, яраланган. У кейинроқ Сиёсий тадқиқотлар институтида ва Администрация миллий мактабида ўқиган, давлат хизматига ишга кириб, сиёсат билан шуғуллана бошлаган.

Ўтган асрнинг 60-йилларида у голлчи (Шарл де Голл тарафдори) бўлган. 1974 йилда Жорж Помпиду вафотидан кейин у голлчиларнинг Демократлар иттифоқини бошқарган, Жискар д'Эстенни президентлик сайловларида қўллаб-қувватлаган, сўнг бош вазир лавозимига тайинланган. Икки йил ўтиб у бош вазирликни тарк этиб, мухолифат вакилига айланган ҳамда Париж мэри лавозимини эгаллаган.

Жак Ширак 1995 йилдан 2007 йилгача Франция президенти бўлган. Икки марта — 1974-1976 йилларда ва 1986-1988 йилларда мамлакат бош вазири бўлган. Бош вазирлигининг иккинчи муддатида бир вақтнинг ўзида Париж мэри лавозимида бўлган. У Франция пойтахтини 18 йил (1977 йилдан 1995) йилгача давомида бошқарган.

Ширак Иккинчи Жаҳон урушида яҳудийларнинг депортация қилинишига Франциянинг дахлдорлигини биринчи бўлиб тан олгани, шунингдек, АҚШнинг Ироққа бостириб киришини қўллаб-қувватлашдан бош тортгани билан танилган. Унинг энг катта сиёсий ислоҳотларидан бири эса президентлик муддатини 7 йилдан 5 йилга қадар қисқартириш бўлган.

Ширак 2005 йилда инсультни бошдан кечирган, сўнгги йилларда унинг соғлиги ёмонлашиб бораётганди.

Кўпроқ янгиликлар