Ўзбекистонда илк маротаба халқаро хайрия марафони ўтказилади

Ўзбекистон 16:32 / 23.09.2019 3517

1-3 ноябрь кунлари Самарқанд шаҳрида халқаро хайрия марафони бўлиб ўтади. Ахборот ва оммавий коммуникациялар агентлигида бўлиб ўтган «Samarkand half marathon» матбуот анжуманида марафоннинг мақсади ҳамда ўтказилиш тартиби хусусида маълумот берилди.

Халқаро хайрия марафони Ўзбекистонда илк марта ўтказилаётган бўлиб, у маданият ва санъат объектларининг инклюзивлиги (жисмоний имконияти чекланган шахслар учун керакли шароитларнинг мавжудлиги) муаммосига жамоатчилик эътиборини жалб қилиш ҳамда соғлом турмуш тарзини тарғиб қилиш, Ўзбекистонда спорт туризмини оммалаштиришни мақсад қилади.

«Samarkand half marathon»да тажрибали югурувчилар билан бир қаторда ҳаваскор югурувчилар ҳам қатнашишлари мумкин. Иштирокчилар 21, 10 ва 2 км узоқликдаги масофани босиб ўтишлари режалаштирилган. Ғолиблар учун рағбатлантирувчи совғалар мавжуд.

Анжуманда маълум қилинишича, ярим марафоннинг дастлабки икки кунида маданий ва таълимий тадбирлар ўтказилади. Тадбирнинг биринчи кунида халқаро экспертлар иштирокида давра суҳбати бўлиб ўтади. Маданият вазирлиги қошидаги Маданият ва санъатни ривожлантириш жамғармаси томонидан Тошкентдаги маданият муассасаларида ногиронлиги бўлган, ҳаракати чекланган шахслар учун етарли шароитлар мавжудлиги борасида мониторинг ўтказилаётган бўлиб, натижалар ҳисоботи давра суҳбати доирасида тақдим этилади. Узоқ масофаларга югуриш мусобақаси 3 ноябрь куни бўлиб ўтади.

«Марафон давомида пойга иштирокчилари шаҳарнинг барча асосий диққатга сазовор жойларини кўришади, ярим марафоннинг ўзи «Регистон» ансамбли ёнидан бошланади. Ярим марафон йўналиши IAAF (Халқаро енгил атлетика федерациялари ассоциацияси) ва AIMS (Халқаро марафон ва километрлар ассоциацияси) томонидан тасдиқланиб, сертификатланади. RussiaRunning халқаро компанияси тадбирни юқори даражада ўтказиш учун тегишли консултацияларни бериб боради», ─ дейди «Samarkand half marathon» лойиҳаси куратори Мирхон Сагитов.

Мирхон Сагитов

Маданият ва санъатни ривожлантириш жамғармаси вакили Мадина Бадалованинг таъкидлашича, уч кунлик тадбирлар давомида тасвирий санъат асарларининг тактил (қўл билан ушлаб ҳис қилиш мумкин бўлган) кўргазмаси  ташкиллаштирилади.

«Шунингдек, ярим марафон доирасида Beat Films кинофестивали билан ҳамкорликда ҳужжатли кинофильмлар намойиши ўтказилади», ─ дейди Мадина Бадалова.

Мадина Бадалова

Ярим марафондан тушган маблағлар Тошкентдаги театрлардан бирида тифлошарҳлаш (кўзи ожизлар учун маълумотни қабул қилиш имконини берувчи усул) амалиётини йўлга қўйиш учун сарфланади.

Ярим марафонда иштирок этмоқчи бўлганлар 20 октябрь санасига қадар рўйхатдан ўтишлари мумкин. Рўйхатдан ўтиш ва марафон ҳақида SAMARKANDHALFMARATHON.UZ  манзили орқали тўлиқ маълумот олиш мумкин.

Кўпроқ янгиликлар